Հայ գիտնականները գիտական աստիճան ստանալու համար պետք է հրապարակումներ ունենան միջազգային պարբերականներում

Հայաստանի Բարձրագույն որակավորման հանձնաժողովը մտադիր է գիտական աստիճան ստանալու համար միջազգային պարբերականներում հրապարակումների առկայության պարտադիր պահանջ ներդնել, ասաց կառույցի նախագահ, պրոֆեսոր Արտուշ Ղուկասյանը:

«Այսօր Հայաստանի միայն քիչ թվով երիտասարդ գիտնականները հրապարակումներ ունեն միջազգային հանդեսներում»,- երկուշաբթի ասաց Ղուկասյանը:

Նա նշեց, որ օրերս այդ հարցը երիտասարդ գիտնականների հետ քննարկվել է Ծաղկաձորում, և ենթադրվում է այդ պահանջը մտցնել 2013 թվականից:

Ղուկասյանը նշեց նաև, որ 2011 թվականին 17 երիտասարդ հայ գիտնականներ գիտական աստիճաններ են ստացել արտասահմանում:
«Այդ գիտական աստիճաններից տասնհինգը ստացել են Ռուսաստանում, մեկը՝ Շվեդիայում և ևս մեկը՝ Լեհաստանում»,- հայտնեց Ղուկասյանը:
Նրա խոսքով, 2010 թվականի ցուցանիշի համեմատ, արտերկրում գիտական աստիճան պաշտպանած հայ գիտնականների թիվը որոշակիորեն կրճատվել է՝ նախորդ տարի հանձնաժողովը հաստատել է 26 գիտական աստիճան: -0-