Հայ բաժանորդները 2012թ.-ից կարող են միանալ ազգային ռոումինգին. կարգավորիչ

ԵՐԵՎԱՆ, 12 հոկտեմբերի. /Նովոստի-Արմենիա/. Հայ բաժանորդները 2012թ.-ից կարող են միանալ ազգային ռոումինգին, «Նովոստի» միջազգային մամուլի կենտրոնում ասաց ՀՀ հանրային ծառայությունները կարգավորող հանձնաժողովի (ՀԾԿՀ) անդամ Սամվել Արաբաջյանը:
Ազգային ռոումինգը մի ծառայություն է, որը թույլ կտա միևնույն երկրի ներսում փոխել տվյալ օպերատորին և օգտվել այլ օպերատորից նույն քարտով:

«Հանձնաժողովը պատրաստ է 2012թ.-ին Հայաստանում ներդնել «ազգային ռոումինգ» հասկացությունը, ինչը թույլ կտա բաժանորդներին տարբեր շրջաններում բջջային կապի մեկ օպերատորից անցնել մյուսին՝ պահպանելով համարը»,- Արաբաջյանի խոսքը մեջբերում է telecom.arka.am հայկական պորտալը:

Սակայն, ինչպես նշեց Հանձնաժողովի ներկայացուցիչը, հայ օպերատորները դեռ տեխնիկապես պատրաստ չեն նման ծառայությունների տրամադրման, և դրա համար որոշակի ժամանակ է պահանջվում:

Միաժամանակ նա նշեց, որ դա չի նշանակում, որ Հայաստանը հրաժարվում է անցնել  Mobile number portability (բջջային համարի փոխանցելիություն) ծառայությանը՝ ընդգծելով, որ դրա ներդրման ժամկետները կախված կլինեն ոչ միայն սեփական ցանցում օպերատորների կատարած ներդրումներից և տեխնիկական վերազինումից, այլ նաև՝ համապատասխան օրենսդրային բազայից:

«Այդ ուղղությամբ աշխատանքներն արդեն սկսված են, սակայն շատ հարցեր կան, այդ թվում՝ տեխնիկական»,- ասաց Արաբաջյանը:
Նա նաև նշեց, որ հարևան Վրաստանը միայն կես տարի առաջ է ներմուծել MNP ծառայությունը: -0-