Mediagid.am տեղեկատվական ագրեգատորի նոր տարբերակը կգործարկվի առաջիկայում, ուրբաթ լրագրողներին հայտնեց «All Media» ՓԲԸ-ի տնօրեն Արմեն Մարտիրոսյանը:
«All Media» ՓԲԸ-ն 2010 թվականի նոյեմբերի 30-ից նոր ինտերնետ նախագիծ է գործարկել՝ Հայաստանում www.mediagid.am առաջին տեղեկատվական ագրեգատորը, որը լրատվության մշակման և համակարգման ավտոմատ համակարգ է ներկայացնում:
«Առաջիկայում մենք ծրագրում ենք գործարկել Mediagid-ի նոր տարբերակը, որն ավելի բազմաֆունկցիոնալ կլինի և նախատեսում է գործընկերների ու համակարգի օգտագործողների համար նախատեսված գործիքների բավականին լայն տեսականի»,- ասաց Մարտիրոսյանը:
Նրա խոսքով, այսօր համակարգին են միացված հայկական ավելի քան 20 առաջատար կայքեր, իսկ համակարգի կողմից օրական մշակվող լրատվությունը գերազանցում է ավելի քան 1300 միավոր տեղեկատվություն ռուսերեն, հայերեն և անգլերեն լեզուներով:
Մարտիրոսյանը միաժամանակ նշեց, որ նույն սկզբունքով գործող Յանդեքս-Նովոստի համակարգն օրական մշակում է Հայաստանից ստացված ընդամենը 800 միավոր տեղեկություն:
«Փաստորեն, միայն հայկական կայքերից մենք ստանում և մշակում ենք 70-80 տոկոսով ավելի տեղեկություն»,- ասաց «All Media» ՓԲԸ-ի ղեկավարը:
www.mediagid.am կայքի տեղեկատվությունը տրամադրվում է համակարգի գործընկերների՝ հայկական ԶԼՄ-ների կողմից: Համակարգի գլխավոր սկզբունքներն են օպերատիվությունը, արդիականությունը, հասանելիությունը, անկողմնակալությունն աղբյուրների նկատմամբ:
«All Media» ՓԲԸ-ն ստեղծվել է 2010 թվականին Հայաստանում ինտերնետ նախագծերում վենչուրային ներդրումներ իրականացնելու նպատակով: «All Media» ՓԲԸ-ի հետաքրքրության ոլորտում են նաև ինտերնետ-մարքեթինգը, ինտերնետ-գովազդը, PR-ն ինտերնետում, կայքերի մշակումն ու առաջխաղացումը, կոնտեքստային գովազդը, կայքերի աուդիտը, քոնսալթինգը: -0-Ն.Ա.
