Հայաստանում մեդիագովազդը (բաներներ) ամենամեծ ճանաչումն է վայելում գովազդի այլ տեսակների մեջ, «Նովոստի-Արմենիա» գործակալությանն ասաց All Media ընկերության տնօրեն Արմեն Մարտիրոսյանը:
«Ըստ հանրաճանաչության, երկրորդ տեղում է կոնտեքստային գովազդը, որն աճի մեծ ներուժ ունի, ինչը պայմանավորված կլինի փոքր և միջին ձեռնարկությունների՝ ինտերնետում հայտնվելով», - ընդգծեց նա:
Ինչպես նշեց Մարտիրոսյանը, զարգացած ինտերնետ-շուկա ունեցող երկրներում պատկերն ամբողջովին հակառակն է՝ կոնտեքստային գովազդի մասնաբաժինը էականորեն գերազանցում է մեդիագովազդի ծավալները:
Նրա խոսքով՝ ինտերնետ-գովազդի հնարավորություններից ամենաշատը օգտվում են ֆինանսական հատվածի ընկերությունները, կապի օպերատորներն ու ավտոմեքենաներ ներկրողները: «Այս ամենը կապված է այն հանգամանքի հետ, որ այդ ընկերությունների գովազդային բյուջեները թույլ են տալիս միջոցներ տեղաբաշխել գովազդի տեղադրման տարբեր ուղղություններում, այդ թվում նաև ինտերնետում», - ասաց փորձագետը:
Խոսելով Հայաստանում ինտերնետային գովազդի լսարանի գնահատականների մասին՝ Մարտիրոսյանը նշեց այս ոլորտի կոնկրետ ցուցանիշների բացակայության մասին, քանի որ այստեղ որևէ ուսումնասիրություն չի կատարվում: «Սակայն հայկական ինտերնետ-լսարանի մեծության և կառուցվածքի մասին մոտավոր պատկերացում կարելի է կազմել ռուսական վարկանիշային համակարգերի տվյալների հիման վրա», - նշեց նա: Այսպես, Liveinternet.ru վիճակագրական սերվիսի տվյալների համաձայն, Հայաստանում օրվա ընթացքում ինտերնետից օգտվում է միջինը 630 հազար մարդ:
«Սակայն հարկավոր է հաշվի առնել, որ այս թիվը համարժեք չէ մարդկանց թվին, քանի որ միևնույն մարդը կարող է ինտերնետ մտնել մի քանի համակարգիչներից, բջջայիններից և այլ սարքավորումներից», - պարզաբանեց փորձագետը:
Նախորդ տարվա համեմատ՝ հայկական ինտերնետի միջին օրական լսարանն ավելացել է 5 անգամ, իսկ մեկ մարդու դիտումները՝ 3 անգամ:-0-
