Ֆիզիկայի միասնական պետական քննություն հանձնած դիմորդների շուրջ 70 տոկոսը չի կարողացել հաղթահարել 7,5 միավոր դրական գնահատականի շեմը, երկուշաբթի «Նովոստի-Արմենիա» գործակալությանը հայտնեց Հայաստանի Գնահատման և թեստավորման կենտրոնի (ԳԹԿ) մամուլի քարտուղար Գայանե Մանուկյանը։
«Ֆիզիկայի միջին գնահատականը կազմել է 6,2 միավոր։ Ամենաբարձր գնահատականները՝ 17,5-20 միավորը, հավաքել են 187-ից միայն երկու դիմորդներ, մինչդեռ կտրվել է 132 դիմորդ»,- նշեց նա։
Մանուկյանը հիշեցրեց, որ մոտավորապես նմանատիպ իրավիճակ է մաթեմատիկայի դեպքում, որից կտրվել է դիմորդների 67 տոկոսը։
Ինչ վերաբերում է Հայոց պատմությանը, ապա ԳԹԿ-ի մամուլի քարտուղարի խոսքով, իրավիճակը հարաբերականորեն լավ է։
«Պատմության միջին միավորը կազմել է 11,9։ Քննություն հանձնածների 10,4 տոկոսին հաջողվել է հավաքել ամենաբարձր միավորները։ Դրական գնահատականի շեմը չեն հաղթահարել 12 տոկոսը՝ 30 դիմորդ»,- ասաց Մանուկյանը։
Հունիսի մեկին Հայաստանում և Լեռնային Ղարաբաղում մեկնարկած ՄՊՔ-ի առաջին փուլին 1209 հայտ է ներկայացվել։ Ընդ որում՝ բուհերում պահպանվել են 20 928 տեղերը, որոնցից 2 428-ը՝ անվճար, իսկ 18,5 հազարը՝ վճարովի։
Դա նշանակում է, որ այս տարի դիմորդները, հաղթահարելով 7,5-8 միավորի նվազագույն շեմը, կարող են ուսանող դառնալ ավելին, նրանցից ոմանք կկարողանան սովորել անվճար հիմունքով։ -0-
