2020-2030թթ.-ին մերձերկրյա ուղեծիր նոր արբանյակների արձակումը կարող է չափազանց դժվարանալ կամ գրեթե անհնար դառնալ տիեզերական աղբի կուտակման պատճառով, կարծում է Բյուրականի աստղադիտարանի տնօրեն Հայկ Հարությունյանը:
«Այն մասնիկներն ու բեկորները, որոնք մեծ արագությամբ պտտվում են Երկրագնդի շուրջ, դառնում են գործող «ականներ» կամ «գնդակներ» և սպառնալիք են պարունակում գործող բոլոր ապարատների համար (մերձերկրյա ուղեծրում)», - ուրբաթ մամուլի ասուլիսի ժամանակ ասաց նա:
Այս կապակցությամբ Հարությունյանը պարզաբանեց, որ այդ բեկորները շարժվում են վայրկյանում 10 կմ արագությամբ, ընդ որում զենքի գնդակի արագությունը կազմում է վայրկյանում մեկ կմ-ից քիչ:
«Հաշվի առնելով այն, որ գնդակի համեմատ բեկորի զանգվածը 100 անգամ մեծ է, նրանք ունեն 10 անգամ ավելի շատ էներգիա, ինչը սպառնալիք է ներկայացնում», - ասաց նա:
Միաժամանակ աստղադիտարանի տնօրենն ասաց, որ դեպքեր են եղել, երբ աղբի բեկորները բախվել են գործող տիեզերանավերի հետ, սակայն այսօրվա դրությամբ հասցված վնասի փոխհատուցման գործում մեխանիզմներ դեռևս չեն մշակվել:
«Համապատասխան միջազգային պայմանագրեր չկան, այժմ իրավական բազայի ձևավորման ուղղությամբ ուսումնասիրություններ են կատարվում», - ասաց նա:
Հարությունյանը տեղեկացրեց նաև, որ մերձերկրյա ուղեծրում կուտակվել է շուրջ 6 հազար տոննա մետաղ: Սա բնական օբյեկտների զանգվածից ավել է, որոնք միշտ այս կամ այն քանակությամբ առկա են մերձերկրյա տարածքում:
«Նրանք (տիեզերական աղբի օբյեկտներ) կուտակվել են Երկրագնդի մակերեսից մի քանի հարյուր կմ-ից մինչև 1500-1600 կմ հեռավորության վրա, ինչպես նաև գեոստացիոնար ուղեծրում, որի բարձրությունը շուրջ 40 հազար կմ է», - ասաց նա՝ ավելացնելով, որ Երկրագնդի շուրջ վերջինների պտույտի արագությունը հավասար է մոլորակի պտույտի արագությանը:
Հարությունյանի խոսքով՝ երկրի վրա բեկորների անկման սպառնալիք, անխոս, կա, սակայն հաշվի առնելով այն, որ Երկրագնդի բնակեցված հատվածների մակերեսը ավելի քիչ է, քան ծովերի, օվկիանոսների, անտառների չբնակեցված տարածքների մակերեսը, ապա դրանք, հիմնականում, ընկնում են անմարդաբնակ տարածքների վրա:-0-
