2011թ.-ին Հայաստանում երիտասարդական ավելի քան 150 դրամաշնորհային ծրագրեր կիրականացվեն, որին կմասնակցեն շուրջ 200 երիտասարդներ, ուրբաթ «Երիտասարդ գիտաշխատողների հետազոտությունների աջակցության ծրագիր-2010» մ մրցույթի հաղթողներին դրամաշնորհների հանձնման արարողության ժամանակ հայտնեց Գիտության պետական կոմիտետի նախագահ Սամվել Հարությունյանը:
Մրցույթը կազմակերպվել է Գիտության պետկոմիտեի կողմից՝ «Բարեպաշտ սերունդ» հիմնադրամի աջակցությամբ:
«Այսօրվա միջոցառումը երիտասարդ սերնդին աջակցելու կառավարական ծրագրի մի մասն է: Ես վստահ եմ, որ նման ծրագրերը կկարողանան խոչընդոտել արտերկրում «մեր ուղեղների հոսքին»»,- ասաց նա:
Ըստ Հարությունյանի, մրցույթին ընդամենը 32 նախագիծ է հաղթել: Մրցույթն անցկացվում է երկու կատեգորիայում՝ ասպիրանտական աշխատանքներ և թիմային նախագծեր:
«Մրցույթի արդյունքում հաղթող է ճանաչվել 32 գիտական ծրագիր. 16 ասպիրանտի կտրվի 1.5 մլն ՀՀ դրամ մեկամյա անհատական աջակցություն, իսկ գիտական հետազոտությամբ զբաղվող մինչև 35 տարեկան 3 գիտաշխատողներից կազմված 16 խմբերին՝ տարեկան 3,5 միլիոն դրամ երկամյա աջակցություն»,- տեղեկացրեց նա:
Պետկոմիտեի նախագահը վստահություն հայտնեց, որ մրցույթում հաղթած երիտասարդների մի մասը հայտնի գիտնականներ կդառնան Հայաստանում և արտերկրում:
«Եթե անգամ նրանց 15-20 տոկոսը հետագայում շարունակեն զբաղվել գիտական գործունեությամբ՝ դա արդեն մեծ ներդրում կլինի հայկական գիտության զարգացման գործում»,- նշեց նա:
Միջոցառման ընթացքում Հարությունյանը և «Բարեպաշտ սերունդ» հիմնադրամի ղեկավար Բարսեղ Բեգլարյանը նաև Հիմնադրամի և Գիտության պետկոմիտեի միջև մտադրությունների հուշագիր ստորագրեցին: -0-
