Արարատ լեռան վրա երկնաքարային նոր խառնարան է հայտնաբերվել. թերթ

Արարատ լեռան վրա երկնաքարային նոր խառնարան է հայտնաբերվել, գրում է «Նովոյե վրեմյա» թերթը:

Ըստ թերթի, այն հայտնաբերել են աստղաֆիզիկոսներ Վահագն Գուրզադյանը (Երևանի ֆիզիկայի ինստիտուտ) և Սվեր Աարսեթը (Քեմբրիջի համալսարան):

Բացահայտման մասին պատմող հոդվածը շուտով հրապարակվի «Observatory» բրիտական գիտական պարբերականում, սակայն հայտնվելով Քորնելի համալսարանի կայքում՝ այն արագորեն տարածվել է ողջ աշխարհում:

Գիտնականներն ինչ-որ ձևով կարողացել են Թուրքիայի իշխանությունների թույլտվությունը ստանալ և բարձրանալ լեռան հյուսիսային ու արևմտյան լանջերը, որոնք փակ են:

Խառնարանը գտնվում է 2100 մետր բարձրության վրա, ունի 70 մետր տրամագիծ և 15 մետր խորություն: Գուրզադյանն ու Աարսեթը կարծում են, որ այն կարող էր առաջանալ տիեզերական մարմնի հարվածի արդյունքում, ընդ որում չի բացառվում նաև խառնարանի հրաբխային ծագումը: Միաժամանակ միանգամայն հերքվում է խառնարանի սառցե ծագման մասին վարկածը:-0-