ԵՐԵՎԱՆ, 27 մայիսի. /Նովոստի-Արմենիա/. Շոկոլադի օգտակարությունն ապացուցվել է բազմիցս` այն ոչ միայն համեղ է և տրամադրություն է բարձրացնում, այլ նվազեցնում է ինֆարկտի և ինսուլտի ռիսկը:
Այժմ Հարվարդի Չանի անվան հանրային առողջության դպրոցի (Harvard T.H. Chan School of Public Health) գիտնականներն Էլիզաբեթ Մոստովսկու գլխավորությամբ պարզել են, որ շոկոլադը նաև նվազեցնում է առկայծող առիթմիայի զարգացման ռիսկը: Չափավոր քանակությամբ, բայց կանոնավոր կերպով մուգ շոկոլադ ուտող մարդիկ 10-20%-ով պակաս են տառապում այդ հիվանդությամբ, քան նրանք, ովքեր գրեթե չեն օգտագործում կակաոյից ստացած արտադրանքը, գրում է
vesti.ru-ն:
Загружается новость ...
"Право"
Ուսումնասիրությունը բավականին լայնածավալ էր` դրան մասնակցել է 50-ից 64 տարեկան ավելի քան 55 հազար դանիացիներ, ովքեր առաջին անգամ իրենց առողջության և սննդակարգի մասին հարցաթերթիկներ են լրացրել 1993-ից 1997 թվականներն ընկած ժամանակահատվածում: Այդ ընթացքում ավելի քան 3,3 հազար մարդ հիվանդացել է առկայծող առիթմիայով կամ նախասրտերի թրթիռով (այդ վիճակն առկայծող առիթմիայից տարբերվում է նրանով, որ սիրտը խփում է նորմայից արագ, բայց ռիթմը չի փոխվում):
Հաշվի առնելով այնպիսի գործոններ, ինչպիսիք են` ալկոհոլը, ծխելը, զարկերակային ճնշումը, խոլեստերինի մակարդակը, հետազոտողները համեմատել են առիթմիայի առաջացման ռիսկը շոկոլադ սիրողների և չսիրողների մոտ:
Որպես մեկ չափաբաժին ընտրվել է շոկոլադի մեկ ունցիա` 28 գրամից մի փոքր ավելի: Նրանք, ովքեր ամսական մեկից երեք անգամ կերել են մեկ ունցիա շոկոլադ, 10%-ով պակաս դեպքում են հիվանդացել առիթմիայով, քան նրանք, ովքեր օգտագործել են շոկոլադ ամսական մեկ անգամից պակաս:
Շաբաթական մեկ չափաբաժինը նվազեցրել է առիթմիայի զարգացման ռիսկը 17%-ով, իսկ շաբաթական երկուսից վեց չափաբաժինը` 20%-ով:
Ընդհանուր առմամբ, շոկոլադի դանիացի սիրահարներն ավելի առողջ էին, ունեին ավելի լավ կրթություն և ավելի հազվադեպ էին հիվանդանում շաքարախտով և հազվադեպ էին տառապում զարկերակային բարձր ճնշումից:
