ԵՐԵՎԱՆ, 29 մարտի. /Նովոստի–Արմենիա/. Մարդկանց կողմից Մարսի գաղութացումը կկատարվի առաջիկա հարյուր տարիների ընթացքում։ ՏԱՍՍ–ին տված բացառիկ հարցազրույցում այսպիսի կարծիք է հայտնել մեր ժամանակի ամենաազդեցիկ և հայտնի տեսաբան ֆիզիկոսներից մեկը` Սթիվեն Հոքինգը։
«NASA–ի և համաշխարհային այլ տիեզերական գործակալությունների ուշադրությունը կենտրոնացած է Մարսի վրա։ Դա Երկրին նման ամենամոտ մոլորակն է` հողով և մթնոլորտով։ Եվ թեև Լուսինը գաղութացնելն ավելի դյուրին կլիներ – այն Երկրից ընդամենը երեք օրվա թռիչք է պահանջում, Մարսի յուրացումն առավել հետաքրքիր է և իսկապես ինքնավար գաղութի ստեղծում կպահանջեր»,– վստահ է գիտնականը, գրում է
moya-planeta.ru–ն։
«Կասկած չունեմ, որ առաջիկա 100 տարիներին մարդիկ բնակություն կհաստատեն Մարսի վրա։ Դա իրականացնելու համար գիտելիքների բարելավման համար ներդրումներ են անհրաժեշտ, որ հասկանանք, թե ինչպես կարելի է ապրել տիեզերական ռադիացիայի և մարդու օրգանիզմում բացասական փոփոխությունների վտանգի պայմաններում, ինչպես պայքարել կենսական կարևորության ռեսուրսների բացակայության դեմ Երկրի սահմաններից դուրս»,– ընդգծել է Քեմբրիջի համալսարանի գրավիտացիոն ֆիզիկայի պրոֆեսորը։
Հայտնի ֆիզիկոսը կարծում է, որ ապրելու համար մարդկությանն ապագայում անհրաժեշտ է լքել Երկիրը և ապաստան գտնել այլ մոլորակների վրա։
«Երկարաժամկետ հեռանկարում ողջ մնալու համար կարևոր է, որ մենք կարողանանք լքել մեր փխրուն մոլորակի սահմանները։ Երկրի վրա մեր հետագա ապրելու համար բազմաթիվ սպառնալիքներ կան, օրինակ, միջուկային պատերազմը, գլոբալ ջերմացումը և գենետիկորեն վերափոխված վիրուսները, և այդ սպառնալիքների թիվը, հավանաբար, կավելանա նոր տեխնոլոգիաների զարգացմանը զուգընթաց։ Մեզ անհրաժեշտ է սփռվել տիեզերքում և տեղափոխվել այլ աստղերի վրա, որ Երկրի վրա սպասվող աղետը մարդկության վերացում չնշանակի»,– նշել է նա։
Գիտնականները պատմել են, թե ինչպիսին կլինի աշխարհը հարյուր տարի հետո>>
Հոքինգի կարծիքով, երկնային ինչ–որ մարմնի հետ Երկրի բախումից մարդկության կործանման հավանականությունն ավելին չէ, քան հենց մարդկանց մեղքով աշխարհի վերջի հավանականությունը։ «Վերջին բախումը խոշոր աստղակերպի հետ 70 տարի առաջ էր։ Մեր` ողջ մնալու համար ավելի ակնհայտ սպառնալիքներ կան»,– ավելացրել է գիտնականը։ -0-
