Հայազգի քիմիկոս Իվան Ապրահամյանն արժանացել է CLP հեղինակավոր մրցանակի

ԵՐԵՎԱՆ, 27 փետրվարի. /Նովոստի-Արմենիա/. Դարտմուտի հետազոտական համալսարանի քիմիայի ամբիոնի դոցենտ, հայազգի Իվան Ապրահամյանն (Ivan Aprahamian) արժանացել է Քրամ Լեն Պեդերսեն (CLP) հեղինակավոր մրցանակի սուպրամոլեկուլային քիմիայի բնագավառում, գրում է now.dartmouth.edu կայքը:

Ինչպես հայտնում է քոլեջի կայքը, Իվան Ապրահամյանը հայտնի է մոլեկուլային փոխարկիչների ոլորտում իր աշխատանքով: «Բացի պոտենցիալ կիրառումներից, մենք ցանկանում ենք օգտագործել մեր ակտիվացված փոխարկիչները հակաուռուցքային դեղորայքի արդյունավետության բարձրացման գործում»,- ասել է գիտնականը, փոխանցում է ռեսուրսը:

CLP մրցանակը կոչված է 1987 թվականի քիմիայի ոլորտում Նոբելյան մրցանակը կիսած երեք քիմիկոսների` Դոնալդ Ջ. Քրամի (ԱՄՆ), Ժան Մարի Լենի (Ֆրանսիա) և Չարլզ Պեդերսենի (ԱՄՆ) պատվին և տրվում է սուպրամոլեկուլային քիմիայի օրիգինալ և անկախ աշխատանքների հեղինակ-գիտնականներին: Սուպրամոլեկուլային քիմիկոսը ստեղծում է գործիքներ, որոնք օգնում են մոլեկուլներին տարբերակել միմյանց, փոխազդել` հավաքվելով ավելի խոշոր գործող միավորների մեջ` նոր խնդիրներ լուծելու համար:

«Սա մեծ պատիվ է ինձ համար,- ասել է Ապրահամյանը: - Սա սուպրամոլեկուլային քիմիայի ամենակարևոր մրցանակն է իմ մակարդակի գիտնականի համար: Սա նաև իմ թիմի անդամների` վերջին ութ տարիներին կատարած աշխատանքի միջազգային ճանաչումն է և ոլորտի բարելավման հարցում նրանց ներդրած ավանդի վկայությունը»:

Սուպրամոլեկուլային (վերմոլեկուլային) քիմիան (Supramolecular chemistry) – հարակից գիտական ճյուղ է, որն ընգրկում է միջմոլեկուլային (ոչ կովալենտ) փոխազդեցությունների միջոցով մեկ ամբողջության մեջ միավորված, մոլեկուլներից ավելի բարդ քիմիական համակարգերի դիտարկման քիմիական, ֆիզիկական և կենսաբանական ասպեկտները: -0-