Հայ քիմիկոսը Թագավորական քիմիական միության հեղինակավոր պարգևի է արժանացել

ԵՐԵՎԱՆ, 9 մայիսի. /Նովոստի-Արմենիա/. Պրոֆեսոր Սյուզաննա Հարությունյանն արժանացել է Թագավորական քիմիական միության հեղինակավոր պարգևի՝ հոմոգեն կատալիզի ոլորտում կատարած գյուտի համար:

Ինչպես «Նովոստի-Արմենիա» գործակալությանը հայտնեցին միության մամուլի ծառայությունից, Հարությունյանն աշխատում է Հոլանդիայի համալսարանում, բայց ծնվել-մեծացել է Երևանում:

Նրա աշխատությունը նվիրված է մոլեկուլների սինթեզի նոր մեթոդին, որը լայն կիրառում կգտնի դեղագործության, նուրբ քիմիական և ագրոքիմիական արդյունաբերությունում: Գիտնականը ստացել է 2000 ֆունտ ստերլինգ, մեդալ և հավաստագիր:

«Բազմաթիվ լայնորեն կիրառվող մեթոդներն այդքան էլ արդյունավետ չեն, և արտադրության ընթացքում ավելի մեծ թվով թափոններ են գոյանում, քան մաքուր արտադրանք: Իմ հետազոտությունը կնպաստի լավագույն դեղորայքի արտադրությանը և շրջակա միջավայրի մաքրության պահպանմանը»,- ասել է Հարությունյանը:

Նրա խոսքով, նոր մեթոդները ոչ միայն թույլ կտան նոր միացություններ ստանալ, այլ նաև արդեն գոյություն ունեցող մեթոդիկաների լավագույն այլընտրանքը կդառնան:

Հոմոգեն կատալիզի ոլորտում պարգևի են արժանանում իրենց յուրատիպությամբ, կարևորությամբ և արդյունքների որակով աչքի ընկած հետազոտությունները: Պարգևն ընդգծում է թիմային աշխատանքի կարևորությունը քիմիայում:

Թագավորական քիմիական միությունը (Royal Society of Chemistry, RSC) Մեծ Բրիտանիայում գործող գիտական հանրություն է, որի նպատակը քիմիայի զարգացումն է: Կազմակերպությունը զբաղվում է գիտական հետազոտություններով, հրապարակում է ամսագրեր և գրքեր, ստեղծում է տվյալների բազա, անցկացնում է համաժողովներ, սեմինարներ և սիմպոզիումներ, ինչպես նաև իրավունք ունի ընտրելու քիմիայի բնագավառի՝ աչքի ընկնող ձեռքբերումները: -0-