ԵՐԵՎԱՆ, 9 նոյեմբերի. /Նովոստի–Արմենիա/. 35 տարեկանից հետո երեխայի ծնունդը դրական ազդեցություն է ունենում կնոջ կոգնիտիվ ընդունակությունների վրա, համոզված են Հարավային Կալիֆոռնիայի համալսարանի մասնագետները։ Նրանց հետազոտության արդյունքները հրապարակվել են Journal of the American Geriatrics Society ամսագրում, հակիրճ պատմում է դրա մասին
Science Daily–ն։
Ամերիկացի գիտնականների հետազոտությանը մասնակցել է դաշտանադադարի ժամանակահատվածում գտնվող 830 կին։ Մասնագետներն ուսումնասիրել են, թե ինչպես է վերարտադրողականության ժամանակահատվածի տևողությունը և հորմոնալ հակաբեղմնավորիչների ընդունումն ազդում միջին տարիքի կանանց մտածողության, ուշադրության և հիշողության վրա։
Պարզվել է, որ ուշ հղիությունը (35 տարեկանից հետո) և հորմոնալ հակաբեղմնավորիչները կարող են դրական ազդեցություն ունենալ խոսքի հիշողության և ճանաչողության վրա։ Գիտնականները դա բացատրում են հղիության ժամանակ և երեխայի ծնունդից հետո կատարվող հորմոնալ փոփոխություններով։
«Դա, իհարկե, չի նշանակում, որ պետք է սպասել 35 տարեկանի` երեխա ունենալու համար,– գրում է հետազոտության հեղինակ Ռոքսանա Քարիմը։ – Այնուամենայնիվ, մեր եզրակացությունները վկայում են ավելի հասուն տարիքում վերջին հղիության դրական էֆեկտի մասին։ Անհրաժեշտ են լրացուցիչ ուսումնասիրություններ` այդ մեխանիզմն ամբողջությամբ գնահատելու և հասկանալու համար», – նշել է նա։
