Գիտնականները բացահայտել են երկարակեցության ուղին

ԵՐԵՎԱՆ, 21 մայիսի. /Նովոստի-Արմենիա/. Մեծ ընտանիքները և սոցիալական ամուր կապերն օգնում են պրիմատներին ավելի երկար ապրել: Դա պարզել են Էքսեթերի համալսարանի գիտնականները` ուսումնասիրելով Պուերտո Ռիկոյի մոտ հազար ռեզուս մակակների:

Արդյունքը, մասնագետների խոսքով, կիրառելի է նաև մարդու նկատմամբ: Ինչպես գրում է Lenta.ru-ն, հետազոտության մամուլի հաղորդագրությունը հրապարակվել է
Phys.org կայքում:

Որպես պրիմատների սոցիալական կապերի թվի ցուցանիշ կենսաբանները վերցրել են անհատի մտերիմների թիվը: Պարզվել է, որ յուրաքանչյուր բարեկամ նվազեցրել է կենդանու մահվան հավանականությունն առաջիկա տարում 2.3 տոկոսով:

Այդ կապը, սակայն, չի հայտնաբերվել տարեց էգերի մոտ: Գիտնականները կարծում են, որ դրա պատճառը պրիմատների ավագ սերնդի և երիտասարդ կապիկների վարքագծի տարբերություններն են: Այսպես, կենդանիները հակված են ագրեսիա դրսևորել` խմբում տեղ զբաղեցնելու համար, և ցանկանում են, որ կոլեկտիվի մյուս անդամները նրանց համար հոգ տանեն, օրինակ, օգնեն ազատվել մակաբույծներից: Տարեց մակակներն ավելի ընտրողական էին սոցիալական կապերի մեջ, ինչը նվազեցնում էր նրանց քանակը, չնայած մեծ ընտանիքի առկայությանը:

Գիտնականները կարծում են, որ հետազոտության արդյունքները կօգնեն իմանալ, թե ինչպես են հնագույն մարդիկ գոյակցել միմյանց հետ, և արդյոք դա ազդել է նրանց կյանքի որակի վրա: Այսպիսով, սոցիալական կապերը բարերար ազդեցություն են ունենում երկարակեցության վրա, էվոլյուցիան այդ կերպ կարող էր նպաստել առաջին հասարակությունների զարգացմանը: -0-