Բժշկության Նոբելյան մրցանակ է շնորհվել թթվածնին բջիջների արձագանքի ուսումնասիրության համար

ԵՐԵՎԱՆ, 7 հոկտեմբերի./Նովոստի–Արմենիա/. Ֆիզիոլոգիայի և բժշկության նոբելյան մրցանակ են ստացել ամերիկացիներ Ուիլյամ Քելինը և Գրեգ Սեմենզան, ինչպես նաև բրիտանացի Փիթեր Ռեթքլիֆը, հայտնում է РБК–ն` Նոբելյան կոմիտեի հղումով։

«Թթվածնի հիմնարար նշանակությունը հայտնի է հնագույն ժամանակներից, իսկ ահա թե ինչպես են բջիջները հարմարվում թթվածնի մակարդակի փոփոխություններին, երկար ժամանակ անհայտ էր մնում։ Նոբելյան դափնեկիրների այս տարվա աշխատանքը բացահայտեց այն մեխանիզմները, որոնք պատասխանատու են թթվածնի մատակարարման փոփոխությունների նկատմամբ բջիջների արձագանքի համար»,– ասվում է հաղորդման մեջ։

Նոբելյան կոմիտեում նշել են, որ Ռեթքլիֆի, Սեմենզայի և Քելինի գյուտն օգնել է սակավարյունության, քաղցկեղի և շատ այլ հիվանդությունների դեմ պայքարում։

Նոբելյան մրցանակի չափը կազմում է 9 մլն շվեդական կրոնա ($913 հազ)։

Ֆիզիոլոգիայի և բժշկության բնագավառում դափնեկիրին հայտարարելով սկսվել է Նոբելյան շաբաթը։ Երեքշաբթի կշնորհվի մրցանակը ֆիզիկայի, չորեքշաբթի` քիմիայի, հինգշաբթի գրականության բնագավառում։ Ուրբաթ` հոկտեմբերի 11–ին, հայտնի կդառնա խաղաղության Նոբելյան մրցանակակիրը։ -0-