Բժիշկները հերքել են եղանակի և հոդացավերի միջև կապը

ԵՐԵՎԱՆ, 15 հունվարի. /Նովոստի-Արմենիա/. Ավստրալացի գիտնականները հերքել են այն ընդունված կարծիքը, թե եղանակի փոփոխությունները բացասաբար են ազդում մեջքի ցավերից կամ արտրիտով տառապող մարդկանց վրա, գրում է vokrugsveta.ru կայքը:

Սիդնեյի գլոբալ առողջության ինստիտուտի մասնագետները հետևել են մեջքի ցավերից տառապող 1000 մարդու և ծնկահոդի օստեոարտրիտ ունեցող 350 մարդու առողջական վիճակին:

Ուսումնասիրությունը տևել է երեք ամիս, այդ ընթացքում միջին օրական ջերմաստիճանը տատանվել է 5,4-ից 32,8 աստիճանի սահմաններում ըստ Ցելսիուսի:

Հետազոտողները նշել են եղանակային պայմաններն այն օրը, երբ ցավ են զգացել, և դրանից մի քանի օր առաջ նույնպես ֆիքսել են ջերմաստիճանը: Արդյունքները չեն բացահայտել որևէ կապ մեջքի ցավի և օդի ջերմաստիճանի, ինչպես նաև խոնավության, մթնոլորտային ճնշման, քամու ուղղության և տեղումների քանակի միջև:

Մասնագետները նշում են, որ շոգ եղանակին մի փոքր ավելանում էին գոտկատեղի ցավերի գանգատները, բայց այդ կախվածությունը կլինիկապես նշանակալի չէր:

«Մեջքի ցավերի համար վատ եղանակն էին մեղավոր համարում դեռևս Հին Հռոմի ժամանակներում: Բայց մեր հետազոտությունները ցույց են տվել, որ դա կարող է հիմնված լինել միայն այն փաստի վրա, որ մարդիկ հակված են հիշելու իրենց պնդումները հաստատող իրադարձությունները», — ասում է հետազոտության համահեղինակ Քրիս Մեյերը:

Մեջքի մշտական ցավերից տառապում է երկրագնդի բնակչության մինչև մեկ երրորդը:

60 տարեկանից բարձր տղամարդկանց գրեթե 10 տոկոսը և կանանց 18 տոկոսն ունեն օստեոարտրիտ:
Բժիշկների խոսքով, պետք չէ այդքան մեծ ուշադրություն դարձնել եղանակին, քանի որ այն լուրջ ազդեցություն չունի արտրիտի վրա: Բացի այդ, դրա վրա ազդել հնարավոր չէ: Ավելի լավ է՝ կենտրոնանալ հիվանդության կանխարգելման և բուժման վրա: -0-