Բրիտանացի գիտնականները գենային մոդիֆիկացման կենթարկեն մարդու սաղմը

ԵՐԵՎԱՆ, 1 փետրվարի. /Նովոստի–Արմենիա/. Մեծ Բրիտանիայի մարդու բեղմնավորման և սաղմնաբանության վարչությունը թույլ է տվել Լոնդոնի Ֆրենսիս Կրիկի համալսարանի գիտնականներին գենային մոդիֆիկացման ենթարկել մարդկային սաղմերը, գրում է bbc.com–ը։

Դոկտոր Քեթի Նիականի գլխավորած գիտական հետազոտության հիմնական նպատակն է` հասականալ, թե ինչ գեներ են պետք սաղմին հաջող զարգացման համար։

Գիտնականները կուսումնասիրեն բեղմնավորումից հետո ձվաբջջի կյանքի առաջին յոթ օրերը, քանի որ այս ժամանակահատվածում այն բաժանվում է` մեկ բջջից հասնելով մոտ 250–ի։ Բացի այդ, որոշ բջիջներ արդեն որոշակի գործառույթներ են սկսում կատարել։ Իսկ գեներից կախված է` կապրի բջիջը, թե ոչ։

Ենթադրվում է, որ ստացված տվյալները կօգնեն, մասնավորապես, բարելավել սաղմի զարգացման գործընթացն արտամարմնային բեղմնավորման ժամանակ։ Նոր մշակումները կօգնեն նաև անպտղության բուժման և վիժումների ու երեխաների տարբեր արատների կանխարգելման հարցում։

Հետազոտությունում կօգտագործվեն միայն այդ նպատակների համար տրամադրված սաղմերը։ Գիտնականները չեն կարողանա կանանց փոխպատվաստել գիտափորձում ներառված սաղմերը։



Hinxton Group ոսկրածուծի բջիջների, էթիկայի և իրավունքի միջազգային կոնսորցիումը նախորդ տարվա սեպտեմբերին հայտարարություն է տարածել, որում կոչ է արել թույլ տալ մարդու սաղմի գենային մոդիֆիկացումը։ Եվրոպայում այս պրակտիկան արգելված է։

Իսկ նախորդ տարվա ապրիլին գիտնականների միջազգային խումբը կոչ է արել չինացի գործընկերներին դադարեցնել մարդու սամղի գենային փոփոխությունների հետ կապված փորձարկումները հետազոտության ընթացքում առաջացած անսպասելի մեծ թվով մուտացիաների պատճառով։

Հիշեցնենք, որ գիտական առաջընթացը դադարեցնելու կոչով բոլորովին վերջերս հանդես էր եկել տեսաբան–ֆիզիկոս Սթիվեն Հոքինգը` նախազգուշացնելով մարդկության վերացման վտանգի մասին։ -0-