ԵՐԵՎԱՆ, 11 սեպտեմբերի. /Նովոստի-Արմենիա/. Singularity (Global Solutions Program) համալսարանի գլոբալ խնդիրների լուծման տասշաբաթյա ծրագրի մասնակիցները ներկայացրել են իրենց հեղափոխական նախագծերը, որոնք ընդունակ են բարելավել մեկ միլիարդ մարդու կյանքը:
«Ֆուտուրիստը» ներկայացնում է ծրագրի եզրափակչի մասնակիցների հինգ գաղափարներ:
1. Վիտամիններ յուրաքանչյուր ընտանիքում
Երեք միլիարդ մարդ ողջ աշխարհում տառապում է սակավակերությունից: Հասարակածին մոտ ապրող մեկ միլիարդ մարդ տառապում է B վիտամինի պակասից, ինչը հանգեցնում է առողջական լուրջ խնդիրների: Nutrigene նախագիծն առաջարկում է լուծել այդ խնդիրը կենսառեակտորի ստեղծման միջոցով, որը թույլ կտա անհրաժեշտ վիտամիններ և միկրոտարրեր գեներացնել տնային պայմաններում: Կենսառեակտորում կօգտագործվեն 3D-տպագրության տեխնոլոգիաներ և մանրէաբանական սինթեզ: Nutrigene-ի թիմը կարծում է, որ իրենց պրոդուկտն ավելի արդյունավետ և հասանելի կլինի, քան գոյություն ունեցող տարբերակները:
2. Պատվաստանյութերի սառեցման մատչելի տեխնոլոգիաներ
Ավելի քան մեկ միլիարդ մարդ չի կարող իրեն սառեցման տեխնոլոգիաներ թույլ տալ: Տարեկան ավելի քան մեկ միլիոն մարդ է մահանում ամկետանց պատվաստանյութերի պատճառով: Afriji-ն մշակում է սառեցման ոչ շատ թանկ տեխնոլոգիա: Թիմը ծրագրում է ստեղծել սառեցման ջերմաէլեկտրական մոդուլ: Նախագծի մասնակիցների կարծիքով, այդպիսի սառնարանները երկարաժամկետ կլինեն, հասանելի և էներգիայի մի շարք ոչ ցանցային աղբյուրների հետ համատեղելի:
3. Ընտանի կենդանիների գեները կարող են բուժել նրանց տերերին
Բժշկության առաջընթացն արագացնելու համար անհրաժեշտ է բավարարել գենետիկ բաց տվյալների կարիքը: Մարդու գենոմն իր ընտանի կենդանու գենոմներից տարբերվում է ընդամենը 10%-ով: Մարդու և կենդանիների գենետիկայի միջև այդ կապը կարելի է օգտագործել բժշկական մշակումների համար: Basepaws-ն աշխատում է մարդու օրգանիզմի անհրաժեշտ բջիջներին դեղերը լավագույնս հասցնելու ուղղությամբ: Նրանք ծրագրում են վերլուծել կենդանիների գեների համապատասխան մոդուլները: Դրա համար նրանք ԴՆԹ-ի նմուշ են վերցնում կենդանիների մազաֆոլիկուլներից: Իր առաջին պրոդուկտի համար Basepaws-ը ցանկանում է ընտանի կատոների գենետիկ թեստավորման կոմպլեկտ ստեղծել: Այն կաշխատի բջջային հեռախոսների և վզկալների հետ, որոնք անասնաբույժներին առողջական խնդիրների մասին ազդակներ կուղարկեն:
4. Արեգակնային էներգիա ամենուր, ամեն ժամանակ
Մեր մոլորակն ամեն օր արեգակնային էներգիայի բավարար քանակ է ստանում: Բայց արևային էներգիայի կիրառմամբ էկոլոգիապոս մաքուր քաղաքակրթությունն ուտոպիա է թվում, գոնե այն պատճառով, որ արևային էներգետիկան կախված է եղանակից և օրվա ժամից:
Այդ խնդիրն առաջարկում են լուծել արևային էներգիայի հուսալի պահոցների և դրա տեղափոխման վերգետնյա ենթակառուցվածքի ստեղծման միջոցով:
Սակայն ReBeam-ն առաջարկում է տիեզերական ծավալների լուծում՝ ուղեծրում տեղադրել միկրոալիքային արտացոլիչներ, որոնք ցերեկը կհավաքեին արևային էներգիան և կուղարկեին այն Երկիր գիշերը:
5. Արհեստական ինտելեկտը կարող է լուծել տեխնոլոգիական գործազրկության խնդիրը
udexter թիմը ներկայացրել է տեխնոկրատ ապագա, որտեղ մարդկանց աշխատատեղերը ռոբոտներ կզբաղեցնեն: Թիմը տեխնոլոգիական գործազրկության խնդիրը լուծելու համար մշակում է AI—Dexter նախագիծ՝ հիմնված արհեստական ինտելեկտի վրա: Այն կօգնի տարբեր մասնագիտությունների մարդկանց աշխատանք գտնել և մնալ աշխատաշուկայում: AI—Dexter ծրագրային ապահովումն ամենավաղ փուլում է առայժմ: Ծրագիրը տվյալներ է հավաքում օգտատիրոջ մասին և նրան հարմար թափուր տեղեր է փնտրում:
Երկարաժամկետ հեռանկարում AI—Dexter-ը կհարմարվի աշխատաշուկայի փոփոխություններին, ինչպես նաև կուրվագծի կարիերայի զարգացման առավել արդյունավետ ուղիները:-0-
