Ինչպես հայաստանցիները կարող են տեսնել Երկրին մոտեցող աստերոիդը. մեկնաբանում է փորձագետը

ԵՐԵՎԱՆ, 9 փետրվարի. /Նովոստի–Արմենիա/. Կապույտ կետի չափերի հասնող աստերոիդն ուրբաթ կանցնի Երկրի կողքով մեր մոլորակի և Լուսնի միջև եղած հեռավորության մեկ հինգերորդից պակաս հեռավորության վրա։

Ինչպես ավելի վաղ հաղորդել է Daily Mail–ը, CB-2018 աստերոիդը հայտնաբերվել է NASA–ի կողմից նախորդ կիրակի և Երկրի կողքով կանցնի ընդամենը 39 000 մղոն (64 000 կիլոմետր) հեռավորության վրա։

NASA–ի համաձայն, աստղակերպը կանցնի մեր մոլորակի կողքով Գրինվիչի ժամանակով 22։30–ի սահմաններում (Երևանի ժամանակով` շաբաթ լույս գիշերը ժամը 02:30–ին)։

Ինչպես «Նովոստի–Արմենիա» գործակալությանը մեկնաբանեց Բյուրականի աստղադիտարանի տնօրեն Արեգ Միքայելյանը, թռչող աստերոիդը Հայաստանից գրեթե անհնար կլինի տեսնել։

Նա ընդգծեց, որ նման երևույթներին հաճախ շատ դժվար է հետևել մեր երկրից, քանի որ դրանք թույլ են արտահայտված։

«Հնարավոր է թռչող աստերոիդը տեսնել հեռադիտակի միջոցով, սակայն շատ դժվար կլինի որսալ հստակ պահը։ Անզեն աչքով, սակայն, անհնար կլինի տեսնել», – ասաց Միքայելյանն ու հավելեց, որ մոտեցող աստերոիդը վտանգավոր չէ մոլորակի համար։

«NASA–ն ունի վտանգավոր աստերոիդների ցանկը, և նրանք միշտ վերահսկում են այդ մարմինները», – ասաց Միքայելյանը։

Նա նաև նշեց, որ NASA–ի հաշվարկներով գոյություն ունեն մի քանի հազար օբյեկտներ, ովքեր մոտ են Երկիր մոլորակին։

«Ոչ մեծ աստերոիդները (մի քանի մետր), որպես կանոն, այրվում են մթնոլորտում` չհասնելով Երկիր մոլորակի մակերևույթին։ Նման օրինակներից են ասուպները, որոնք իրենց չափսերով շատ փոքր են (մի քանի միլիմետր)», – ավելացրեց Միքայելյանը։–0–