Դարաշրջանի ավարտ. Yahoo!–ն այլևս գոյություն չունի

ԵՐԵՎԱՆ, 17 հունիսի. /Նովոստի–Արմենիա/. Yahoo!–ն հայտարարել է Verizon Communications հեռահաղորդակցական հոլդինգին հիմնական բիզնեսի վաճառքի գործարքի ավարտի մասին։ Հունիսի 16–ից ընկերությունը վերանվանվել է և կոչվում է Altaba Inc.։

Հունիսի 19–ից ընկերության բաժնետոմսերը կշրջանառվեն Nasdaq բորսայում։ Yahoo!–ի գլխավոր տնօրեն Մարիսա Մայերը կհեռանա պաշտոնից` ստանալով 23 մլն դոլարի «ոսկե պարաշյուտ», հաղորդում է telecom.arka.am–ը` հղում անելով Vestifinance.ru–ին։

Verizon–ը Yahoo!–ի ձեռքբերման գործարքն ավարտել է 4,48 մլրդ դոլարով։ Գործարքից հետո ընկերությունը մասնաբաժին կպահպանի (15%) Alibaba Group Holding Limited–ում, ինչպես նաև 36%–ի մասնաբաժին` Yahoo! Japan Corporation–ում։ 

Հունիսի 16–ին Yahoo!–ի մնացած բաժինները վերանվանվել են և կոչվում են Altaba Inc., որը կղեկավարի 15% մասնաբաժինը Alibaba Group Holding Limited–ում, ինչպես նաև 36%–ը Yahoo! Japan Corporation–ում։ Verizon–ին փոխանցված ՏՏ հսկայի մասերը կմիավորվեն Oath նոր ապրանքանիշի ներքո, որում կներառվի նաև AOL–ը։

Oath–ի ստորաբաժանումները կներառեն HuffPost, TechCrunch, Yahoo! Finance, Tumblr ռեսուրսներն ու գովազդային տեխնոլոգիաների ոլորտի բիզնես լուծումները։ Միավորված ընկերությունները օգուտ կստանան Verizon–ի` բաժանորդների տվյալներից։ Այդ տեղեկատվության հաշվին գովազդատուներին, ովքեր այլընտրանք են փնտրում Google–ին և Facebook–ին, կառաջարկվի թիրախային լսարանի ընտրության և գնահատման բարելավված ծառայություն։

Oath–ը նախատեսում է կրճատել անձնակազմի մոտ 15%–ը կամ շուրջ 2100 մարդ 14 հազար աշխատակիցներից։ Կրճատումները հիմնականում կանդրադառնան ադմինիստրատիվ անձնակազմին ու կրկնվող բաժիններին և պաշտոններին։–0–