ԵՐԵՎԱՆ, 11 նոյեմբերի./Նովոստի-Արմենիա/. «Հայրենիք» կուսակցության ղեկավար, ԱԱԾ նախկին տնօրեն Արթուր Վանեցյանը «168 ժամ» լրատվականին տված հարցազրույցում ներկայացրել է իր դիրքորոշումը Ղարաբաղի շուրջ ՀՀ-ի հետ եռակողմ հայտարարության ստորգրման պատժառների և հետևանքների մասին, պատմել երկրի ներսում տեղի ունեցող իրադարձությունների վտանգների, ընդդիմության նախատեսվող հանրահավաքի, ինչպես նաև իր տեսլականը ստողծված դժվար իրավիճակից ելքի մասին:
Загружается новость ... "Лево"
«Նովոստի-Արմենիա» գործակալությունը թեզերով ներկայացնում է Վանեցյանի կողմից հնչեցված մտքերը:
- Այն, ինչ կատարվեց, սպասելի էր, և մենք չկարողացանք կանխել այս արհավիրքը: Դա մեր երրորդ հանրապետության ամենամոթալի ու ամենացավալի էջերից մեկն էր և դրա պատասխանատուն և միակ մեղավորը ՀՀ-ում այսօր պաշտոնավարող դավաճանների խմբակն է:
- Նրանք վերջին 2,5 տարիների ընթացքում արտաքին ուժերի ազդեցության ներքո իրականացրեցին այս ծրագիրը, որն ավարտվեց այս ամոթալի հայտարարության ստորագրումով .
- Facebook-ով կառավարվում է երկիրը, ինչի հետևանքով մենք կանգնել ենք այս արհավիրքի առջև: Հասարակությունն ապրում է Facebook-յան իրականության մեջ, երբ լուրջ մարտահրավերների պայմաններում տեղեկությունը Facebook-ից է ստացվում:
- Պատասխանելով հարցին այն մասին, թե ինչպես Նիկոլ Փաշինյանը եկավ իշխանության՝ հանրության մեջ դժգոհության թե՝ արտաքին ուժերի ազդեցության ներքո, Վանեցյանը նշել է, որ երկու հանգամանքները համընկան: Փաշինյանը բացառիկ հնարավորություն ուներ համախմբելու հասարակությունը, ուժեղացնելու երկիրը և կառուցելու բոլորիս երազանքի Հայաստանը: Այնինչ նա արեց լրիվ հակառակը՝ մենք ունեցանք պառակտված հասարակություն, քադված տնտեսություն, այսօր արդեն կորսված Հայրենիքի մի հատված և հիվանդ հասարակություն, որը մեկնաբանելով նա նշել է, որ խոսքը Facebook-յան իրականության մեջ ապրող հասարակության մասին է:
- Երբ պատերազմը սկսվեց իշխանությունը մտածում էր, որ դա մի քանի օր կտևի, և նրանք փորձելու են հերոսանալ: Նրանք լուրջ չէին վերաբերում:
- Իմ ունեցած տվյալներով, Զինված ուժերը Նիկոլ Փաշինյանին Անվտանգության խորհրդի նիստի ժամանակ դեռևս պատերազմի սկզբի 3-4 օրերից զեկուցել են իրական իրավիճակը և նշել, որ անհրաժեշտ է կնքել հրադադարի պայմանագիր: Այդ ժամանակ, եթե Փաշինյանը սթափ գնահատեր իրավիճակը, մենք կկարողանայինք պահպանել Հադրութը, Ջաբրայիլը, Ֆիզուլին: Եթե այն ժամանակ կնքվեր հրադադարի պայմանագիր, մենք չէնք կորցնի Շուշին, Հադրութը և պայմանագրի շրջանակում կֆիքսեինք Արցախի կարգավիճակը և ամենակարևորը, չէինք ունենա այս թվով զոհեր:
- Կա տեղեկություն, որ ընդդիմության հանրահավաքին չորեքշաբթի կիրականացվեն պրովոկացիաներ՝ քաղաքացիական պատերազմ հրահրելու համար: Դիմում եմ ԱԱԾ-ին և ոստիկանությանը՝ դեմն առեք:
- Ես չեմ ցանկանում Ղարաբաղյան հակամարտության կոնտեքստում, ոչ քննադատել, ոչ էլ պաշտպանել նախկիններին: Բայց մի բան կարող եմ ասել, նախկինները Ղարաբաղը տալիս էին, Ալիևը չվերցրե՞ց, իսկ Նիկոլ Փաշինյանը չէր տալիս, Ալիևը պատերազմով վերցրե՞ց: Երեք նախագահների ժամանակ մենք ունեցել ենք ազատագրված Արցախ, Փաշինյանին փոխանցվել է կայացած պետություն, որտեղ ապրում էին մարդիկ, գործում էր Սահմանադրություն, օրենքներ, գործադիր մարմին, դատարաններ, զարգացող տնտեսություն: ՀՀ ամենամեծ խնդիրը Արցախյան հիմնահարցի լուծումն էր, եթե Նիկոլ Փաշինյանը չգիտեր այդ հիմնահարցի լուծման ձևը, ինչո՞ւ ստանձնեց Հանրապետության վարչապետի պաշտոնը:
– Ազգային ժողովը, որպես առաջնային մանդատով օժտված կառույց, պետք է անհապաղ միջոցներ ձեռնարկի Հայաստանի Հանրապետությունում սահմանադրական կարգը վերականգնելու ուղղությամբ, ավելի ճիշտ` նոր իշխանության ձևավորման համար։
– Եթե Փաշինյանը հրաժարական չտա, կլինի քաղաքական գործընթաց, և ժողովուրդը, և քաղաքական ուժերը կպարտադրեն Նիկոլ Փաշինյանին հեռանալ։ Մենք հակասահմանադրական ճանապարհով երբևիցե չենք իրականացնելու իշխանափոխություն, բայց մենք ունենք այնքան կամք, այնքան ներուժ և հասարակության ստվար զանգվածի աջակցություն, որ կկարողանանք ստիպել, պարտադրել Նիկոլ Փաշինյանին ինքնակամ ներկայացնել հրաժարական։
– Հայաստանի իշխանությունները 2,5 տարվա ընթացքում այնքան փչացրեցին հարաբերությունները բոլոր մեր ավանդական բարեկամ պետությունների հետ, որ չէին կարողանում անգամ պրիմիտիվ հարցերով դիմել։ Հայաստանն իրեն պահում է այնպես, որ կորցնում է բոլոր արտաքին գործընկերների հետ վստահությունը` թե Ռուսաստանի, թե Իրանի, թե Վրաստանի, թե Չինաստանի։
– Երբ ստեղծվի այս պատերազմի քննիչ հանձնաժողովը, այդ ժամանակ բոլոր հարցերի պատասխանները կտրվեն։ Պետք է լինի շատ լուրջ քննություն։ Ազգային ժողովը պետք է օգտագործի իր լծակները, չեմ բացառում, որ որոշակի ստուգումներ իրականացնելուց հետո պետք է հարուցվի քրեական գործ։
– Եթե վաղը (ի նկատի ունի հանրահավաքի օրը` նոյեմբերի 11–ը, խմբգր.) հանկարծակի մեր երկրում սկսեն խժդժություններ, դրա թիվ մեկ պատասխանատուն Նիկոլ Փաշինյանն է։ Մենք որևէ ապօրինի միջոցառում չենք իրականացնելու, մենք որևէ անօրինական գործողություններ չենք իրականացնելու։ Ոստիկանությունը և ԱԱԾ–ն պարտավոր են ապահովել մեր հանրահավաքի անվտանգությունը։
– Մեր օրակարգը հետևյալն է` Նիկոլ Փաշինյանի հրաժարական, կառավարության հրաժարական, ազգային համաձայնության կառավարության ձևավորում։ Որոշ ժամանակ հետո, համապատասխան օրենսդրական փոփոխություններից հետո բոլոր քաղաքական ուժերն արդեն պատրաստ կլինեն հավասար պայմաններով մասնակցել արտահերթ խորհրդարանական ընտրություններին։ -0-