Ցուցարարները նստացույց են սկսել Երևանում Իրանի դեսպանատան առջև. կան ձերբակալվածներ

ԵՐԵՎԱՆ, 17 հունվարի․/Նովոստի-Արմենիա/․ Այսօր իրանցիները կրկին բողոքի ցույց են անցկացնում Երևանում Իրանի դեսպանատան առջև: Այս մասին հայտնում է Ազատություն ռադիոկայանը։

Ակցիայի մասնակիցները ցանկանում են երթով դեպի Կապույտ մզկիթ շարժվել, սակայն տարածքում գտնվող մեծ թվով ոստիկանները թույլ չեն տալիս:

Ցուցարարները նստացույց են սկսել։ Ոստիկանությունը կոչ է արել նրանց դադարեցնել բողոքի ակցիան դեսպանատան առջև՝ հայտարարելով, որ հակառակ դեպքում կկիրառվեն ուժ և հատուկ միջոցներ։

Երևանում ցուցարարները պահանջում են դադարեցնել Իրանում արյունահեղությունը և կրոնական առաջնորդների հրաժարականը։

Ավելի վաղ Հայաստանում Իրանի Իսլամական Հանրապետության արտակարգ և լիազոր դեսպան Խալիլ Շիրղոլամին իր դժգոհությունն էր հայտնել վերջին օրերին Երևանում Իրանի դեսպանատան շենքի մոտ անցկացվող բողոքի ակցիաների վերաբերյալ։ Նրա խոսքով՝ Թեհրանում «ձևավորվում է այնպիսի պատկերացում, թե Հայաստանը վերածվում է Իրանի նկատմամբ թշնամաբար տրամադրված ուժերի գործողությունների կենտրոնի»։