Տեղի է ունեցել Պուտին–Թրամփ հեռախոսազրույցը․ ի՞նչ են պայմանավորվել գերտերությունների առաջնորդները
ԵՐԵՎԱՆ, 18 մարտի․/Նովոստի–Արմենիա/․ ՌԴ նախագահ Վլադիմիր Պուտինը ԱՄՆ նախագահ Դոնալդ Թրամփի հետ հեռախոսազրույցում հայտարարել է ուկրաինական հակամարտության կայուն և երկարաժամկետ կարգավորման ուղիներ մշակելու պատրաստակամության մասին, հայտնում է ՏԱՍՍ-ը՝ հղում անելով Կրեմլի մամուլի ծառայությանը։
Կրեմլի հաղորդագրությունը
• «Հաստատելով հակամարտության խաղաղ կարգավորման նկատմամբ սկզբունքային հավատարմությունը՝ ՌԴ նախագահը պատրաստակամություն է հայտնել ամերիկացի գործընկերների հետ միասին մանրամասն մշակել կարգավորման հնարավոր ուղիները, որը պետք լինի համապարփակ, կայուն և երկարաժամկետ»,- ասվում է հայտարարության մեջ։
• Պուտինը Թրամփին ասել է, որ Ուկրաինայի շուրջ ստեղծված իրավիճակը խաղաղ ճանապարհով կարգավորելու համար անհրաժեշտ է ամբողջությամբ դադարեցնել ռազմական օգնությունը Կիևին։ «Ընդգծվել է, որ հակամարտության սրումը կանխելու և դրա քաղաքական և դիվանագիտական միջոցներով լուծման ուղղությամբ աշխատելու առանցքային պայմանը պետք է լինեն օտարերկրյա ռազմական օգնության և Կիևին հետախուզական տեղեկատվության տրամադրման ամբողջական դադարեցումը», - ասվում է հայտարարության մեջ։
• Ռուսաստանի ղեկավարն աջակցել է նախագահի գաղափարին Ռուսաստանի Դաշնության և Ուկրաինայի կողմից էներգետիկ օբյեկտների վրա հարձակումից 30 օրով փոխադարձ հրաժարվելու մասին և համապատասխան հրաման է տվել ռուս զինվորականներին։ «Զրույցի ընթացքում Դոնալդ Թրամփը առաջարկել է հակամարտող կողմերին 30 օրով փոխադարձաբար հրաժարվել էներգետիկ ենթակառուցվածքների վրա հարձակումներից, Վլադիմիր Պուտինը դրական է արձագանքել այս նախաձեռնությանը և անմիջապես տվել է համապատասխան հրաման»,- ասվում է հաղորդագրության մեջ։
• Պուտինը նաև նշել է, որ Ռուսաստանը, որպես բարի կամքի ժեստ, Կիևին կփոխանցի ռուսական բուժհաստատություններում բուժվող 23 ծանր վիրավորում ստացած ուկրաինացի զինվորների։
• Ռուսաստանի Դաշնության նախագահը կառուցողական է արձագանքել Թրամփի առաջարկած գաղափարին, որը վերաբերում է «Սև ծովում նավարկության անվտանգության մասին հայտնի նախաձեռնության իրականացմանը»։ «Պայմանավորվածություն է ձեռք բերվել սկսել բանակցություններ՝ նման պայմանավորվածության կոնկրետ մանրամասների հետագա մշակման համար»,- ընդգծել են Կրեմլից։
• Ռուսաստանի և Միացյալ Նահանգների նախագահները հանդես են եկել երկու երկրների միջև հարաբերությունների կարգավորման օգտին՝ հաշվի առնելով աշխարհում կայունության համար նրանց ընդհանուր պատասխանատվությունը։ «Փոխադարձ շահագրգռվածություն է արտահայտվել երկկողմ հարաբերությունների կարգավորման հարցում՝ հաշվի առնելով Ռուսաստանի և ԱՄՆ-ի հատուկ պատասխանատվությունն աշխարհում անվտանգության և կայունության ապահովման համար», - ասվում է հայտարարության մեջ։
Սպիտակ տան հաղորդագրությունը
- Պուտինն ու Թրամփը քննարկել են ռազմավարական սպառազինության տարածումը դադարեցնելու անհրաժեշտությունը, հայտարարել է Սպիտակ տունը։ «Առաջնորդները մանրամասն քննարկել են Մերձավոր Արևելքը՝ որպես ապագա հակամարտությունների կանխարգելման համար հնարավոր համագործակցության տարածաշրջան, քննարկել են նաև ռազմավարական սպառազինության տարածումը դադարեցնելու անհրաժեշտությունը և կապվելու են մյուս կողմերի հետ այս թեզի հնարավորինս լայն կիրառման կապակցությամբ։
- Առաջնորդները համակարծիք են եղել, որ կան հսկայական օգուտներ ապագայի համար ԱՄՆ-ի և Ռուսաստանի երկկողմ հարաբերությունները բարելավման դեպքում, ասվում է Սպիտակ տան գրավոր հայտարարության մեջ:
- Ուկրաինայում խաղաղության ձեռք բերումը խոստանում է հսկայական «տնտեսական գործարքներ» Ռուսաստանի Դաշնության և Միացյալ Նահանգների համար, ինչպես նաև աշխարհաքաղաքական կայունություն աշխարհում:
