ԵՐԵՎԱՆ, 18 սեպտեմբերի./Նովոստի–Արմենիա/. Հայաստանի ուժային կառույցների ղեկավարների հրաժարականները վկայում են պետական կառավարման համակարգի ճգնաժամի խորացման մասին, ասվում է «Սասնա Ծռեր» ազգայնական կուսակցության հայտարարությունում։
ՀՀ նախագահ Արմեն Սարգսյանը սեպտեմբերի 18–ին ստորագրեց Վալերիյ Օսիպյանին ՀՀ ոստիկանապետի պաշտոնից ազատելու հրամանագիրը։ Երկու օր առաջ` սեպտեմբերի 16–ին, հրաժարականի դիմում ներկայացրեց նաև ԱԱԾ տնօրեն Արթուր Վանեցյանը։
«ԱԱԾ տնօրեն Արթուր Վանեցյանի հրաժարականի դեմարշային բովանդակությունը և դրա նկատմամբ 5-րդ շարասյան աջակցող դիրքավորումը ևս մեկ անգամ ապացուցում են, որ եղել է և կա ռևանշի դավադիր պլան և որ այդ պլանը ձախողման վտանգի առաջ է կանգնած»,– կարծում են «Սասնա Ծռեր»–ի անդամները։
Կուսակցությունը ողջունում է Ազգային անվտանգության ծառայության տնօրենի և Ոստիկանության պետի պաշտոնները քաղաքական դարձնելը, նշելով, որ դա, սակայն, շատ մասնակի քայլ է, որը բավարար չէ այդ հույժ կարևոր կառույցների գործառույթներն ազգայնացնելու և դրանք ՀՀ ինքնիշխանությանն ու իրավակարգի պահպանմանը ծառայեցնելու համար:
Загружается новость ...
"Право"
«Ամբողջ պետական կառավարման համակարգը արմատական բարեփոխման կարիք ունի: Հատկապես խնդրահարույց է ԱԱԾ և Ոստիկանության հետ կապված վիճակը: Առաջին հերթին հարկավոր է այս կառույցները զատել խորհրդային ժառանգությունից և զտել հակապետական ու կոռումպացված կադրերից, համապատասխանեցնել ներկայիս մարտահրավերներին և ենթարկեցնել քաղաքական ու քաղաքացիական վերահսկողության: Խիստ մտահոգիչ է վիճակը նաև մյուս բոլոր ոլորտներում»,– ասվում է կուսակցության հայտարարության մեջ։
Ըստ կուսակցության, մտահոգություն է առաջացնում նաև մյուս ոլորտների վիճակը։
«Մեր ազգի և պետության առջև ծառացած բարդ ու դժվարին խնդիրները լուծելու, այդ թվում՝ բոլորիս աչքի առաջ մոբիլիզացվող ռևանշը չեզոքացնելու համար անհրաժեշտ է, որ բոլոր ազգային-ժողովրդավարական ուժերն ու ամբողջ քաղաքացիական հասարակությունը գործող իշխանության հետ միասին համախմբվեն և համաձայնեցված քայլերով երկրում ձևավորեն ճգնաժամի հաղթահարման և հետագա զարգացման նախադրյալներ ու պայմաններ»,– ասվում է հայտարարությունում։
Ուստի «Սասնա Ծռեր»–ը գործող իշխանությանը հորդորում են ներկայիս առօրեական տրամաբանության փոխարեն այլևս գործել հասունացող ռևանշը չեզոքացնելու համար անհրաժեշտ արտակարգ լուծումների դիմելու տրամաբանությամբ։
«Դրա համար պետք է տվյալ փուլում ցուցաբերել առավելագույն լայնախոհություն և ապահովել հնարավորինս մեծ ներառականություն, անհապաղ դադարեցնել ազգային համախմբմանը խոչընդոտող ու հակառակորդի ջրաղացին ջուր լցնող, առաջին հերթին՝ Ամուլսարի հանքի շահագործմանը միտված, գործողությունները, ճգնաժամային խնդիրների և բոլոր ռազմավարական հարցերի լուծման համար անցկացնել հանրաքվեներ կամ կիրառել ուղիղ ժողովրդավարության այլ միջոցներ, ԱԱԾ և Ոստիկանության ղեկավարների պաշտոններում նշանակել այդ կառույցների հետ չկապված, իրենց կենսագրությամբ հանրային հիշողության մեջ բացասական հետք չթողած և պետական ինքնիշխանությունը պահպանելու հարցում վստահություն ներշնչող անձանց»,– վստահ են կուսակցության անդամները։ -0-
