Լուսինե Մարտիրոսյանը գլխավորել է ՀՀ արդարադատության նախարարության աշխատակազմի տեղեկատվության և հասարակայնության հետ կապերի վարչության պետի պաշտոնը
ԵՐԵՎԱՆ, 7 օգոստոսի – Sputnik. ՀՀ արդարադատության նախարարի հրամանով` Լուսինե Մարտիրոսյանը նշանակվել է ՀՀ արդարադատության նախարարության աշխատակազմի տեղեկատվության և հասարակայնության հետ կապերի վարչության պետի պաշտոնում, հայտնում է գերատեսչության մամուլի ծառայությունը:
Համապատասխան հրամանը ստորագրվել է ուրբաթ` օգոստոսի 7-ին։
Մարտիրոսյանը ավարտել է Վ. Բրյուսովի անվան Երևանի պետական լեզվաբանական համալսարանի լեզվաբանության և միջմշակութային հաղորդակցման ֆակուլտետի միջազգային լրագրության բաժինը, ինչպես նաև Երևանի պետական համալսարանի Ժուռնալիստիկայի ֆակուլտետի Հանրային կապեր և լրատվամիջոցների հետ հաղորդակցություն բաժնի մագիստրատուրան։
Աշխատել է որպես լրագրող «Արմենպրես» լրատվական գործակալությունում։ 2012 թվականին աշխատանքի է ընդունվել ՀՀ արդարադատության նախարարության աշխատակազմի տեղեկատվության և հասարակայնության հետ կապերի բաժնում։ Եղել է վարչության պետի տեղակալ և պաշտոնակատար։
Քաղծառայության 1-րդ դասի խորհրդական է։ -0-
