Ղազախստանի նախագահի հայտարարությունը Ռուսաստանի հետ բանակցությունների ընթացքում դիրքերն ամրապնդելու միջոց է. Եպիֆանցև

Ղազախստանի նախագահ Նուրսուլթան Նազարբաևի` Մաքսային միությանը Հայաստանի անդամակցության հարցում ղարաբաղյան խնդրի վերաբերյալ հայտարարությունը Ռուսաստանի հետ բանակցությունների ընթացքում դիրքերն ամրապնդելու միջոց է, կարծում է «Alte et Certe» վերլուծական գործակալության ղեկավար, քաղաքագետ Անդրեյ Եպիֆանցևը։

Գերագույն Եվրասիական տնտեսական բարձրագույն խորհրդի նիստի ընթացքում Ղազախստանի նախագահ Նուրսուլթան Նազարբաևը հայտնել է, որ Ղազախստանը պատրաստ է ստորագրել Մաքսային միության կազմում Հայաստանի անդամակցության մասին «ճանապարհային քարտեզը», սակայն հատուկ կարծիքով, քանի որ Մաքսային միության սահմանների մասին հարցը պարզաբանումներ է պահանջում` Լեռնային Ղարաբաղի խնդրի հետ կապված։

«Որքանով տեղյակ եմ, ընդհանուր առմամբ Ղազախստանի հետ այդ թեման պայմանավորված է, սակայն հաշվի առնելով Ադրբեջանի հետ Ղազախստանի համագործակցության հետ կապված փոքր–ինչ բարդ իրավիճակը, նա (Նազարբաևը) պետք է ֆիքսի իր հատուկ դիրքորոշումը։ Ինչն էլ նա անում է` նման փաստաթղթեր շրջանառելով»,–«Նովոստի–Արմենիա» գործակալությանը տված հարցազրույցում հայտնեց Եպիֆանցևը։

«ՄՄ–ի ընդհանուր մոտեցումն այն է, որ Ադրբեջանի նկատմամբ ողջ հարգանքով հանդերձ` երրորդ երկրները, որոնք չեն մտնում ՄՄ–ի կազմ, չեն կարող կարգավորել ՄՄ–ի կազմ մտնող կամ չմտնող պոտենցիալ անդամների պայմանները, այնպես, ինչպես նաև դրա գործառութային սկզբունքները։ Ինչպես հենց Ադրբեջանն ինքը չի հարցնում իր հարևանների համաձայնությունը` իր ռազմավարական նախագծերը մշակելիս»,–ավելացրել է նա։

Ըստ փորձագետի` դա Բաքվին ուղղված ազդանշան է, որ Ղազախստանն ընդհանուր շահեր է հետապնդում իր հնարավորությունների շրջանակում, և դա նորմալ պրակտիկա է նման քաղաքական հանգամանքներում։

Եպիֆանցևն ավելացրեց նաև, որ մյուս կողմից` վերջին շրջանում Ղազախստանը մի քանի անգամ դժգոհություն է հայտնել այն եկամուտների մակարդակից, որը ստանում է ՄՄ–ի շրջանակում համագործակցությունից և Մոսկվային խնդրել է վերանայել որոշ մոտեցումներ։

Սեպտեմբերի 3-ին Հայաստանի և Ռուսաստանի նախագահներ Սերժ Սարգսյանի և Վլադիմիր Պուտինի բանակցություններից հետո հայտարարվել է, որ Հայաստանը միանալու է Մաքսային միությանը և հետագայում ներգրավվելու է Եվրասիական տնտեսական միության ձևավորման գործընթացում։ ՄՄ Հայաստանի մուտքի ճանապարհային քարտեզը կստորագրվի դեկտեմբերի 24–ին Մոսկվայում կայանալիք Եվրասիական ինտեգրացիոն միության նիստի ժամանակ։ –0–