Իսրայելը պետք է ընդունի Հայոց ցեղասպանությունը. Հոլոքոստի ինստիտուտ

Իսրայելցի սոցիոլոգ, ցեղասպանությունների պատմության մասնագետ, «Հոլոքոստի և ցեղասպանության ինստիտուտի» գործադիր տնօրեն դոկտոր Իսրայել Չառնին կոչ է արել Իսրայելին ճանաչել Հայոց ցեղասպանությունը, հաղորդում է asbarez.com-ը:

«Իսրայելը պետք է վերջ դնի այս խաղին և ամբողջովին ընդունի Հայոց ցեղասպանությունը»,- ասվում է Jerusalem Post Magazine-ում հրապարակած Չառնիի հոդվածում: Չառնիի խոսքով՝ լռելու ժամանակն Իսրայելի համար անցել է, և այսօր պետք է հզոր ազդակ հաղորդել 1915 թվականի ողբերգության ճանաչմանը: Ֆրանսիայի Սենատն ընդունեց ցեղասպանությունների, այդ թվում՝ Օսմանյան կայսրությունում Հայոց ցեղասպանության ժխտման քրեականացման օրինագիծը: Ազատազրկում և 45 հազար եվրո տուգանք նախատեսող այս փաստաթուղթն ընդունվել է ֆրանսիական խորհրդարանի ստորին պալատի՝ Ազգային ժողովի կողմից դեկտեմբերի 22-ին:

Սենատի կողմից ընդունված օրինագիծը պետք է ստորագրվի Ֆրանսիայի նախագահի կողմից: 1915-1923 թթ.

Հայոց ցեղասպանությունը XX դարի առաջին ցեղասպանությունն է, որը կազմակերպել և ծրագրված իրականացրել է երիտթուրքական կառավարությունը։

1915-1923 թթ.-ին Թուրքիայում Հայոց ցեղասպանության փաստի ճանաչումը սկզբունքային նշանակություն ունի հայ ժողովրդի համար, քանի որ Ցեղասպանությունն իրականացվել է՝ Հայկական հարցը փակելու նպատակով։ Հայոց ցեղասպանության փաստը ճանաչել են բազմաթիվ երկրներ, մասնավորապես, Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, Գերմանիան, Հոլանդիան, Սլովակիան, Շվեդիան, Շվեյցարիան, ԱՄՆ 42 նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Կանադայի խորհրդարանի համայնքների պալատը և Լեհաստանի սեյմը, Վատիկանը, Եվրախորհդարանը, Եկեղեցիների համաշխարհային խորհուրդը։ -0-