Ֆրանսիայի Սենատն ընդունեց ցեղասպանությունների, այդ թվում՝ Օսմանյան կայսրությունում Հայոց ցեղասպանության ժխտման քրեականացման օրինագիծը:
Ազատազրկում և 45 հազար եվրո տուգանք նախատեսող այս փաստաթուղթն ընդունվել է ֆրանսիական խորհրդարանի ստորին պալատի՝ Ազգային ժողովի կողմից դեկտեմբերի 22-ին:
Սենատի կողմից ընդունված օրինագիծը պետք է ստորագրվի Ֆրանսիայի նախագահի կողմից:
Անկարայում ավանդաբար չափազանց ցավագին են վերաբերվում Հայոց ցեղասպանության վերաբերյալ մեղադրանքներին, որի փաստը ճանաչվել է բազմաթիվ պետությունների կողմից: Ֆրանսիայի խորհրդարանի ստորին պալատի կողմից օրինագծի ընդունումից հետո, Թուրքիան խորհրդակցության համար հետ կանչեց Փարիզից իր դեսպանին, հայտարարեց Ֆրանսիայի հետ ռազմական և այլ կապերի դադարեցման մասին, չեղյալ հայտարարեց համատեղ զորավարժությունները և մի շարք այլ հակամիջոցներ ընդունեց: Այդ ժամանակ թուրք վարչապետը հայտարարեց Ֆրանսիայի հանդեպ նոր պատժամիջոցների կիրառման հնարավորության մասին՝ կախված օրինագծի ընդունման հետ կապված իրավիճակի զարգացումից:
Ավելին, Թուրքիայի վարչապետը փորձել է ճնշում գործադրել Փարիզի նկատմամբ՝ օգտագործելով «ալժիրական քարտեզը»: Մասնավորապես, Էրդողանը «ցեղասպանություն» է որակել Ալժիրում ֆրանսիական բանակի գործողությունները:
Սակայն այդ հայտարարություններին ի պատասխան՝ Ալժիրում և Ֆրանսիայում ամենաբարձր մակարդակով պատասխան տրվեց:
Սկզբում Ալժիրի վարչապետ Ահմեդ Ույահան կոչ արեց Թուրքիային դադարեցնել գաղութային ժամանակահատվածում ալժիրցիների սպանության թեմայով քաղաքական կապիտալ կուտակել՝ հայտարարելով, որ «ոչ ոք իրավունք չունի օգտագործել ալժիրցիների արյունն իր բիզնեսում»: Այնուհետև Ֆրանսիայի նախագահ Նիկոլա Սարկոզին Էրդողանին հղած իր նամակում հիշեցրեց, որ Փարիզն ընդունել է անցյալի իր սխալները: Նա նախազգուշացրեց նաև, որ այդ օրենքի կապակցությամբ ձեռնարկած չափազանց մեծ քայլերը, կվնասեն երկու երկրների հարաբերությունները, և այդ պատասխանատվությունը կընկնի գործընթացը նախաձեռնողների վրա:
Երկուշաբթի Ֆրանսիայի ԱԳՆ պաշտոնական ներկայացուցիչ Բեռնար Վալերոն Թուրքիային հանդարտության կոչ արեց՝ նշելով, որ Անկարան Փարիզի կարևորագույն գործընկերներից է:
Փորձագետների կարծիքով, ֆրանսիացի խորհրդարանականների սկսած գործընթացը կարող է դոմինոյի էֆեկտ առաջացնել և անցնել եվրոպական այլ երկրներ:
Մասնավորապես, Օսմանյան կայսրությունում Հայոց ցեղասպանության հետ կապված օրենքի ընդունման հավանականության մասին են խոսել Բունդեսթագի անդամները:
1915-1923 թթ. Հայոց ցեղասպանությունը XX դարի առաջին ցեղասպանությունն է, որը կազմակերպել և ծրագրված իրականացրել է երիտթուրքական կառավարությունը։ 1915-1923 թթ.-ին Թուրքիայում Հայոց ցեղասպանության փաստի ճանաչումը սկզբունքային նշանակություն ունի հայ ժողովրդի համար, քանի որ Ցեղասպանությունն իրականացվել է՝ Հայկական հարցը փակելու նպատակով:։
Հայոց ցեղասպանության փաստը ճանաչել են բազմաթիվ երկրներ, մասնավորապես, Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, Գերմանիան, Հոլանդիան, Սլովակիան, Շվեդիան, Շվեյցարիան, ԱՄՆ 42 նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Կանադայի խորհրդարանի համայնքների պալատը և Լեհաստանի սեյմը, Վատիկանը, Եվրախորհդարանը, Եկեղեցիների համաշխարհային խորհուրդը։ -0-
