Իռլանդիան ԵԱՀԿ-ում իր առաջիկա նախագահության ժամանակ հատուկ ուշադրություն կդարձնի կազմակերպության անդամ երկրներում մարդու հիմնարար իրավունքների և ազատությունների պաշտպանությանը, ինչպես նաև ԶԼՄ-ների ազատության ընդլայնմանը, չորեքշաբթի Վիլնյուսում մամուլի ասուլիսում հայտարարել է Իռլանդիայի արտաքին գործերի նախարար Էյմոն Գիլմորը, հայտնում է ՌԻԱ Նովոստին:
Նա խոստացավ մանրամասն ներկայացնել Իռլանդիայի նախագահության գերակայությունները հաջորդ տարում, երբ հանդես կգա հունվարի 12-ին Վիեննայում ԵԱՀԿ Մշտական խորհրդում: Իռլանդացի նախարարը միաժամանակ նշեց այն երեք հիմնական թեմաները, որոնք, ըստ նրա, Իռլանդիան պետք է գերակա համարի ԵԱՀԿ-ում աշխատելու ընթացքում:
«Նախևառաջ, դա հակամարտությունների կարգավորման և կանխման ներուժի բարձրացում է: Որպես երկիր՝ մենք հակամարտությունների կարգավորման սեփական փորձն ունենք, մասնավորապես, Հյուսիսային Իռլանդիայում»,- նշել է Գիլմորը:
Երկրորդ, ասաց նախարարը, որպես առաջնահերթություն ինքը մտադիր է զարգացնել «կոռուպցիայի դեմ պայքարի և կառավարման պատշաճ սկզբունքները»:
«Երրորդ, մենք կաշխատենք խոսքի ազատության, մամուլի ազատության, հատկապես, էլեկտրոնային ԶԼՄ-ների առաջխաղացման ուղղությամբ: Հույս ունենք աշխատանքի ընթացքում ոչ միայն կիսել մեր հասարակության, մեր կառավարության փորձը, այլ նաև ամենատեղեկատվական հատվածի աշխատանքի փորձը»,- ասել է նախարարը:
Նա նշել է, որ բազմաթիվ էլեկտրոնային ԶԼՄ-ներ տեղակայված են Իռլանդիայում: -0-
