ԵՐԵՎԱՆ, 7 դեկտեմբերի. /Նովոստի-Արմենիա/. Միգրացիայի ոլորտում Հայաստանի և ԵՄ-ի համագործակցությունը կարող է լուծել անօրինական միգրացիայի և թրաֆիքինգի խնդիրը, չորեքշաբթի Երևանում հայտարարել է Միգրացիայի հարցերով միջազգային կազմակերպության (IOM) Արևելյան Եվրոպայի և Կենտրոնական Ասիայի երկրներում տարածաշրջանային տնօրեն Ռենատա Հելդը:
«Հայաստանի և ԵՄ-ի միջև վերջերս ստորագրված համաձայնագրի շրջանակներում նախատեսվում է համագործակցություն ծավալել և լուծել այնպիսի խնդիրներ, ինչպիսին են օրինական միգրացիան և ինտեգրումը, անօրինական միգրացիայի և թրաֆիքինգի դեմ պայքարը, ինչպես նաև կացարանի տրամադրումն ու էմիգրանտների միջազգային պաշտպանությունը»,- ասել է Հելդը Միգրացիայի ոլորտում Հայաստանի և ԵՄ-ի փոխգործակցության հարցերին նվիրված միջազգային համաժողովի ժամանակ:
Նրա խոսքով՝ համաժողովի անցկացման գլխավոր խնդիրն այս ոլորտում ԵՄ-ի հետ համագործակցության հարցում Հայաստանի հիմնական նպատակների և ակնկալիքների բացահայտումն է:
«Այսօրվա դրությամբ մեր հիմնական խնդիրն է իրազեկել հասարակությանը միգրացիայի խնդրի վերաբերյալ, լուծել այնպիսի խնդիրներ, ինչպիսիք են էմիգրանտներին հայրենիք վերադարձնելը, նրանց աշխատանքի տեղավորելը, ինչպես նաև Հայաստանին տեխնիկական աջակցություն ցուցաբերելը՝ պետությունում միգրացիայի պատճառները բացահայտելու նպատակով», - նշել է Հելդը:
Նրա խոսքով՝ ԵՄ-ն ակտիվորեն աջակցում է Հայաստանի իրավապահ մարմիններին անօրինական միգրացիայի և թրաֆիքինգի դեմ պայքարի հարցում:
ՀՀ փոխարտգործնախարար Զոհրաբ Մնացականյանն իր հերթին շնորհակալություն է հայտնել համաժողովի կազմակերպիչներին՝ Հայաստանում միգրացիայի խնդրի վերաբերյալ դրսևորած հետաքրքության համար:
«Նման համաժողովները հնարավորություն են տալիս այս ոլորտում ԵՄ-ի հետ համագործակցող հարևան պետությունների հետ քննարկել միգրացիային առնչվող խնդիրների լուծման հնարավորություններն ու տարբերակները», - նշել է Մնացականյանը:
Նրա խոսքով՝ միջազգային կազմակերպությունների մասնացկությամբ քննարկումների արդյունքում հնարավոր կդառնա պատկերացնել միգրացիայի խնդրի իրական պատկերն ու դրա լուծման հեռանկարները:
Պաշտոնական վիճակագրական տվյալների համաձայն, այս տարվա առաջին կիսամյակում Հայաստանում բացասական միգրացիոն սալդոն կազմել է 89 հազար 345 մարդ:-0-
