Հայաստանի կառավարության դիրքորոշումը՝ Սյունիքի մարզպետ Սուրեն Խաչատրյանի հետ կապված միջադեպի վերաբերյալ, կհնչեցվի այն ժամանակ, երբ այդ ամենը հաստատվի իրավական ճանապարհով, չորեքշաբթի կառավարական հարցուպատասխանի ժամանակ ասաց Հայաստանի արդարադատության նախարար Հրայր Թովմասյանը:
Նոյեմբերի 14-ին գործարար Սիլվա Համբարձումյանը հայտնել էր լրագրողներին, որ ծեծի է ենթարկվել Սյունիքի մարզպետի կողմից: Երեքշաբթի կնոջ գրավոր դիմումի հիման վրա Հայաստանի հատուկ քննչական ծառայությունում քրեական գործ է հարուցվել ՀՀ Քրեական օրենսգրքի 118-րդ հոդվածի հատկանիշներով:
Համբարձումյանը հարձակումը բացատրում է մարզպետի հասցեին իր կողմից հնչեցրած մեղադրանքներով: Մասնավորապես, նա հայտնել է, որ Խաչատրյանը «Լիճվազք-Թեյի» հանքահորից 102 միլիոն դրամ (շուրջ 265 հազ դոլար) արժողության սարքավորումներ է յուրացրել:
«Ինքներդ եք ասում, որ քննություն է գնում, և այժմ կառավարության ցանկացած հայտարարություն կարող է դիտվել որպես միջամտություն գործընթացին»,- ասաց Թովմասյանը:
Ըստ նրա, կառավարությունն ուշադիր կհետևի գործի ընթացքին առանց որևէ միջամտության:
«Համապատասխան ընթացակարգերից հետո իրավական և քաղաքական հարթություններում դուք համապատասխան դիրքորոշում, քայլեր և պատասխաններ կտեսնեք»,- ասաց Թովմասյանը:
Նախարարը չհամաձայնեց նաև այն կարծիքի հետ, որ երկրում տիրում է անպատժելիության մթնոլորտ՝ հիշեցնելով, որ բոլորովին վերջերս նմանատիպ երևույթներին համապատասխան պատասխանատվություն է հետևել, չպարզաբանելով, սակայն, թե որ երևույթի մասին է խոսքը:
«Այստեղ ես նկատի ունեմ քաղաքական պատասխանատվությունը»,- ասաց Թովմասյանը:
Սա առաջին միջադեպը չէ, որտեղ դերակատարություն ունեն Հայաստանի բարձրաստիճան պաշտոնյաները: Մասնավորապես, 2010 թվականի դեկտեմբերին հրաժարական է տվել Երևանի քաղաքապետ Գագիկ Բեգլարյանը՝ Հայաստանի նախագահի արարողակարգի ծառայության աշխատակցի հետ ունեցած աղմկահարույց պատմության պատճառով: -0-
