Սարգսյանը Հայաստան-ԵՄ համագործակցության հարցեր է քննարկել Եվրախորհրդարանի պատվիրակների հետ

Հայաստանի նախագահ Սերժ Սարգսյանը չորեքշաբթի ընդունել է Եվրոպական խորհրդարանի պատվիրակությանը՝ պատվիրակության ղեկավար, ՀՀ-ԵՄ խորհրդարանական համագործակցության հանձնաժողովի համանախագահ Միլան Ցաբրնոխի գլխավորությամբ:

Պատվիրակության հետ նա քննարկել է Հայաստան-Եվրամիություն համագործակցության և միջխորհրդարանական կապերի ամրապնդման հարցեր:

Ինչպես հաղորդում է նախագահի մամուլի ծառայությունը, կողմերը քննարկել են նաև Հայաստանի ներքաղաքական գործընթացներին, արտաքին քաղաքականությանն ու տարածաշրջանային խնդիրներին վերաբերող հարցեր:

Մամուլի հաղորդագրության համաձայն, Սարգսյանը հույս է հայտնել, որ Եվրոպական խորհրդարանի ներկայացուցչական պատվիրակության այցը Հայաստան լավ հնարավորություն է տեղում ծանոթանալու Հայաստանի և տարածաշրջանի խնդիրներին, մարտահրավերներին ու զարգացումներին` նպաստելով Հայաստան-Եվրամիություն հարաբերությունների ամրապնդմանը:

Հանրապետության ղեկավարի խոսքով, պատվիրակության անդամների համար օգտակար կլինեն Հայաստանի քաղաքական ուժերի, քաղաքացիական հասարակության և պետական մարմինների ներկայացուցիչների հետ հանդիպումները:

«Մեր ցանկություններն ու ձգտումները միանշանակ են` մենք ուզում ենք օր առաջ ունենալ շատ ավելի բարեկեցիկ, ժողովրդավար և ավելի անվտանգ Հայաստան, կայուն ու խաղաղ տարածաշրջան: Եվ մեր ջանքերն ուղղված են դրան»,-ասել է նախագահ Սարգսյանը:
-0-