Հայաստանի անկախության 20-ամյակին նվիրված միջոցառում է տեղի ունեցել երեքշաբթի ԱՄՆ ներկայացուցիչների պալատի միջազգային գործերի հանձնաժողովում՝ 18 կոնգրեսականների, ԱՄՆ-ում ՀՀ դեսպանատան և ամերիկա-հայկական կազմակերպությունների ներկայացուցիչների մասնակցությամբ, «Նովոստի-Արմենիա» գործակալությանը հաղորդել են Ամերիկայի հայ ազգային կոմիտեից (Armenian National Committee of America - ANCA):
Տոնակատարության ընթացքում ԱՄՆ ներկայացուցիչների պալատի միջազգային գործերի հանձնաժողովի նախագահ Հովարդ Բերմանը (Howard Berman) և կոնգրեսմեն Ադամ Շիֆը (Adam Schiff) պարգևատրվել են «Մխիթար Գոշ» մեդալով՝ Միացյալ Նահանգների կողմից Հայոց ցեղասպանության ճանաչման ուղղությամբ երկար տարիների և նվիրված աշխատանքի, ինչպես նաև Հայաստանի և ԱՄՆ-ի միջև բարեկամական կապերի ամրապանդման համար:
«Ինձ համար մեծ պատիվ է ստանալ «Մխիթար Գոշ» մեդալը: Ես միշտ բարձր կգնահատեմ այն, ինչպես գնահատում են Ամերիկայի և ողջ աշխարհի հայերի հետ բարեկամությունը: Ես երբեք չեմ հրաժարվի իմ պարտավորություններից՝ հայերի համար արդարության հասնելուց, ինչը նշանակում է ԱՄՆ-ի կողմից Հայոց ցեղասպանության պաշտոնական ճանաչում, Թուրքիայի և Ադրբեջանի կողմից Հայաստանի շրջափակման դադարեցում և մեկուսացումից Լեռնային Ղարաբաղի դուրս հանում»,- հայտարարել է Բերմանը:
Կոնգրեսմեն Շիֆն իր հերթին շնորհավորել է ՀՀ-ին՝ անկախության 20-ամյա հոբելյանի առթիվ և երախտագիտություն է հայտնել Ամերիկայի հայ համայնքին: «Հայաստանն ԱՄՆ-ի կարևոր դաշնակիցն ու ժողովրդական հասարակության օրինակ է»,- նշել է նա:
Միջոցառման ընթացքում Կոնգրեսի անդամները երախտագիտության խոսք են ասել հայ ժողովրդին՝ հավաստիացնելով, որ հետագայում նույնպես կնպաստեն հայ-ամերիկյան հարաբերությունների ամրապնդմանը և երկու երկրների միջև առևտրաշրջանառության զարգացմանը:
Կոնգրեսմենները նաև կոչ են արել Թուրքիային օրինական սեփականատերերին վերադարձնել իրենց տարածքում գտնվող բռնագրավված եկեղեցիները և ընդգծել են Լեռնային Ղարաբաղի ժողովրդի ինքնորոշման իրավունքի իրականացման կարևորությունը:
Հանրապետական Բրեդ Շերմանը (Brad Sherman) նաև ընդգծել է Վրաստանի Ջավախքի շրջանում բնակվող դժվար կացության մեջ գտնվող հայերին օգնություն ցուցաբերելու անհրաժեշտությունը:
Տոնակատարության ընթացքում Լեռնային Ղարաբաղի Հանրապետությունը ներկայացրել է ԱՄՆ-ում ԼՂՀ մշտական ներկայացուցիչ Ռոբերտ Ավետիսյանը:
2010թ.-ի մարտի 4-ին ԱՄՆ կոնգրեսի ներկայացուցիչների պալատի միջազգային գործերի հանձնաժողովը Հայոց ցեղասպանության ճանաչման մասին բանաձև ընդունեց, ինչը Թուրքիայի դժգոհությունն առաջացրեց՝ ընդհուպ պաշտոնական Անկարայի կողմից ԱՄՆ-ում դեսպանի հետկանչումը: Սակայն Հայոց ցեղասպանության ճանաչման մասին բանաձևը մինչև այժմ ներառված չէ ԱՄՆ կոնգրեսի ներկայացուցիչների պալատի նստաշրջանի օրակարգում: -0-
