Չեխիայի Հանրապետությունում ՀՀ դեսպանն իր հավատարմագրերն է հանձնել նախագահ Կլաուսին

Չեխիայի Հանրապետությունում ՀՀ նորանշանակ դեսպան Տիգրան Սեյրանյանը չորեքշաբթի իր հավատարմագրերն է հանձնել Չեխիայի նախագահ Վացլավ Կլաուսին, չորեքշաբթի «Նովոստի-Արմենիա» գործակալությանը տեղեկացրեցին ՀՀ ԱԳՆ մամուլի ծառայությունից:

«Հավատարմագրերի հանձնման արարողությունից հետո առանձնազրույց տեղի ունեցավ նախագահ Կլաուսի և ՀՀ դեսպանի միջև: Նախագահ Կլաուսը, շնորհավորելով դեսպան Սեյրանյանին նշանակման կապակցությամբ, գոհունակություն հայտնեց երկու երկրների միջև ձևավորված բարեկամական հարաբերությունների առնչությամբ», - նշվել է տեղեկատվության մեջ:

Չեխիայի նախագահը հույս է հայտնել, որ Հայաստանի նորանշանակ դեսպանն իր կարևոր ներդրումը կունենա չեխ-հայկական համագործակցության առավել ամրապնդման գործում:

Դեսպան Սեյրանյանն իր հերթին շնորհակալություն է հայտնել նախագահին և պատրաստակամություն է հայտնել ջանքեր չխնայել երկու պետությունների միջև բազմակողմ հարաբերությունների զարգացման համար:
Զրույցի ընթացքում անդրադարձ է կատարվել նաև հայ-չեխական տնտեսական համագործակցությանը, ղարաբաղյան հակամարտության կարգավորմանը և տարածաշրջանային խնդիրներին: -0-