Կին-պատգամավորներն արմատական քայլ են համարում Րաֆֆի Հովհաննիսյանի հացադուլը
«Ժառանգություն» ընդդիմադիր խորհրդարանական խմբակցության անդամ Անահիտ Բախշյանը և իշխող Հայաստանի Հանրապետական կուսակցության խմբակցության անդամ Կարինե Աճեմյանը «Ժառանգություն» կուսակցության առաջնորդ Րաֆֆի Հովհաննիսյանի հացադուլն արմատական քայլ են համարում։
«Հացադուլը դա ծայրահեղ միջոց է, որին կարելի է դիմել միայն ծայրահեղ դեպքերում»,- երկուշաբթի լրագրողներին ասաց Աճեմյանը։
Ըստ նրա, ՀՀ խորհրդարանում «Ժառանգություն» կուսակցությանը ամբիոն և բոլոր հարցերի շուրջ իր կարծիքը հայտնելու հնարավորություն է տրվել, և ավելի ճիշտ կլիներ օգտվել դրանից։
Աճեմյանը կոչ է արել իր գործընկերոջը համոզել Հովհաննիսյանին դադարեցնել հացադուլը և վերադառնալ ՀՀ խորհրդարանի նիստերի դահլիճ։ Պատգամավորը կարծում է, որ Հովհաննիսյանի պահանջներում արտակարգ ոչինչ չկա, և դրա համար հացադուլ հայտարարելու կարիք չկար։
«Վերջին տարիներին մեր երկիրը մեծ միջազգային հեղինակություն է ձեռք բերել, և պետք չէ հերքել բոլոր նվաճումները...Մենք մեծ բարեփոխումներ ենք անցկացնում, արդեն շատ ոլորտներում առաջխաղացումներ են նկատվում։ Բայց պետք չէ միանգամից շատ բանի սպասել, քանի որ խնդիրները տարիների ընթացքում են կուտակվել»,- ասաց Աճեմյանը։
«Ժառանգություն» ընդդիմադիր խորհրդարանական խմբակցության անդամ Անահիտ Բախշյանն իր հերթին ասաց, որ Հովհաննիսյանի հացադուլը PR-ակցիա չէ։
«Եթե դուք հետևում եք «Ժառանգություն» կուսակցության գործունեությանը, ապա համաձայնեք, որ այդ քայլն ամենաարմատականն է դարձել, որին դիմել է կուսակցության առաջնորդ Րաֆֆի Հովհաննիսյանը՝ իրեն և իր առողջությունը զոհաբերելով, որպեսզի իշխանություններին ցույց տա, որ նրանք կորցնում են իրենց ժողովրդին»,- ասաց Բախշյանը։
Միաժամանակ պատգամավորը նշեց, որ Հովհաննիսյանը կուսակցության գործընկերների հետ հացադուլ հայտարարելու հարցը չի քննարկել։ -0-
