ՌԴ նախագահ Դմիտրի Մեդվեդևը ժամանել է Վաշինգտոն, որտեղ հինգշաբթի նախատեսված են ռուս-ամերիկյան բարձր մակարդակի բանակցությունները:
Ինչպես հաղորդում է ՌԻԱ Նովոստիի թղթակիցը, ՌԴ նախագահի ինքնաթիռը վայրէջք է կատարել Վաշինգտոնի մոտակայքում գտնվող «Էնդրյուս» ավիաբազայում տեղական ժամանակով ժամը 01:30-ին (Երևանի ժամանակով 10:30-ին): Մեդվեդևը ժամանել է Կալիֆոռնիայից, որտեղ ԱՄՆ կատարած այցի առաջին երկու օրը բանակցություններ է վարել Կալիֆոռնիայի նահանգապետ Առնոլդ Շվարցնեգերի հետ, այցելել է բարձր տեխնոլոգիաների ոլորտում գործող ամերիկյան մի քանի ընկերություններ և ելույթ է ունեցել Սթենֆորդի համալսարանում:
Մեդվեդև-Օբամա բանակցությունները կսկսվեն հինգշաբթի տեղական ժամանակով ժամը 10:30-ին (Երևանի ժամանակով 19:30-ին): Նախագահները ծրագրում են քննարկել Առևտրի համաշխարհային կազմակերպությանը Ռուսաստանի միանալու հարցը, Ռազմավարական հարձակողական սպառազինությունների պայմանագրի վավերացման համաժամանակացումը, ապազինման և զենքի չտարածման թեման, ինչպես նաև միջազգային և տածաշրջանային կարևոր խնդիրներ, այդ թվում նաև Կորեական թերակղզում, Մերձավոր Արևելքում, Ղրղզստանում և Աֆղանստանում տիրող իրավիճակը, Իրանի միջուկային ծրագիրը:-0-
