Թուրքիան կարող է միջազգային դատական ատյաններում վիճարկել հայոց ցեղասպանության ճանաչման բանաձևերը, չորեքշաբթի հայտարարեց Թուրքիայի ԱԳՆ պաշտոնական ներկայացուցիչ Բուրակ Օզյուգերգինը։
Թուրքիան ավանդաբար հերքում է Առաջին համաշխարհային պատերազմի տարիներին Օսմանյան կայսրությունում շուրջ մեկուկես միլիոն հայերի ոչնչացումը և շատ ցավոտ է արձագանքում Արևմուտքի քննադատությանն այս հարցում։
«Մենք դիտարկում ենք միջազգային իրավունքին դիմելու հնարավորությունը»,- չորեքշաբթի ասել է դիվանագետն Անկարայում, հաղորդում է ՌԻԱ Նովոստին։
Մարտի 4-ին ԱՄՆ Կոնգրեսի Ներկայացուցիչների պալատի արտաքին հարաբերությունների հանձնաժողովի կողմից Օսմանյան կայսրությունում Հայոց ցեղասպանության բանաձևի ընդունումից և մարտի 11-ին Շվեդիայի խորհրդարանի կողմից Հայոց ցեղասպանության ճանաչումից հետո Թուրքիան խորհրդակցությունների համար հետ է կանչել Ստոկհոլմի և Վաշինգտոնի իր դեսպաններին։
«Նրանց վերադարձի ժամանակը հավատարմագրման երկրներ առայժմ որոշված չէ։ Նրանք կվերադառնան, երբ գա ժամանակը»,- ասաց թուրքական ԱԳՆ պաշտոնական ներկայացուցիչը։ Նա չբացառեց, որ Անկարան կարող է վիճարկել բանաձևերը Մարդու իրավունքների Եվրադատարանում։
Դիվանագետի կարծիքով, «խորհրդարաններն իրավունք չունեն դատապարտելու պատմությունը»։ «Այս խնդիրներով պետք է զբաղվեն ոչ թե խորհրդարանները, այլ համապատասխան ատյանները»,- ավելացրեց նա։
Թուրքական իշխանությունները բազմիցս նախազգուշացրել են, որ Հայոց ցեղասպանության ճանաչման բանաձևի ընդունումը վնաս կհասցնի թուրք-հայկական հարաբերությունների բարելավման գործընթացին՝ նախորդ տարվա հոկտեմբերին Թուրքիայի և Հայաստանի ԱԳՆ ղեկավարների կողմից Շվեյցարիայում դիվանագիտական հարաբերությունների և երկկողմ կապերի զարգացման արձանագրությունների ստորագրումից հետո։
Հայաստանի և Թուրքիայի՝ մինչև վերջին ժամանակները բավականին լարված հարաբերությունները սկսեցին կարգավորվել, երբ երկու երկրի արտգործնախարարներ Էդվարդ Նալբանդյանն ու Ահմեդ Դավութօղլուն հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։ Հարաբերությունները բարդացան, երբ Անկարան սկսեց սատարել ադրբեջանական դիրքորոշմանը՝ ղարաբաղյան հարցում, և երբ Թուրքիան կտրուկ արձագանքեց Օսմանյան կայսրությունում 1915թ. հայոց ցեղասպանության միջազգային ճանաչման գործընթացին:-0-
