ԱՄՆ Կոնգրեսի արտաքին հարաբերությունների հանձնաժողովի կողմից Հայոց ցեղասպանության ճանաչման մասին թիվ 252 բանաձևի ընդունումից մի քանի րոպե անց Թուրքիան ետ է կանչել ԱՄՆ-ում իր դեսպան Նամիկ Թանին խորհրդակցությունների նպատակով, հաղորդում է թուրքական Hurriet թերթը:
«Քվեարկությունից մի քանի րոպե անց Թուրքիայի վարչապետ Ռեջեփ Թայիպ Էրդողանը դատապարտել է բանաձևը և հայտարարել, որ Թուրքիան ետ է կանչել իր դեսպանին խորհրդակցությունների համար», - ասվում է տեղեկատվության մեջ:
Ըստ թերթի՝ Թուրքիան զգուշացնում էր, որ ԱՄՆ Ներկայացուցիչների պալատի կամ Սենատի կողմից բանաձևի ընդունման ցանկացած ձև կդառնա ԱՄՆ-ի հետ հարաբերությունների զգալի և երկարատև վատթարացման սկիզբը և կձախողի Երևանի հետ հարաբերությունների կարգավորման գործընթացը:
Ինչպես գրում է Hurriet-ը, ավելի վաղ նախագահ Աբդուլա Գյուլը կոչ էր արել ԱՄՆ նախագահ Բարաք Օբամային՝ օգտագործել իր ազդեցությունը քննարկումների գործընթացն ու բանաձևի ընդունումը արգելափակելու համար՝ զգուշացնելով, որ բանաձևի հաստատումը կվնասի ՆԱՏՕ-ի երկու դաշնակիցների միջև հարաբերություններին:
ԱՄՆ Կոնգրեսի արտաքին գործերի հանձնաժողովը մարտի 4-ին ընդունել է Հայոց ցեղասպանության ճանաչման բանաձևը: Բանաձևի ընդունմանը «կողմ» է քվեարկել 23 կոնգրեսական, դեմ՝ 22 կոնգրեսական:
Երեսուն կետից բաղկացած փաստաթուղթը (թիվ 252 բանաձև) կոչ է անում ԱՄՆ նախագահին՝ ջանքեր գործադրել մարդու իրավունքներին և ազատություններին, էթնիկ զտումների և Հայոց ցեղասպանությանը վերաբերող հարցերին արժանի լուծում տալու համար:
Կոնգրեսականները, փաստորեն, կոչ են անում ԱՄՆ նախագահին պաշտոնապես ճանաչել Հայոց ցեղասպանությունը:
Հայոց Ցեղասպանությունը ХХ դարի առաջին ցեղասպանությունն է։ Թուրքիան ավանդաբար մերժում է Առաջին համաշխարհային պատերազմի տարիներին մոտ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Հայոց Ցեղասպանության հարցի վերաբերյալ Արևմուտքի կողմից արվող քննադատություններին։
Հայոց ցեղասպանության փաստը ճանաչել են բազմաթիվ երկրներ, մասնավորապես, Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, ԱՄՆ-ի մեծ թվով նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Շվեյցարիայի ազգային խորhուրդը, Կանադայի խորհրդարանի համայնքների պալատը և Լեհաստանի սեյմը:
Հայոց ցեղասպանության զոհերի հիշատակի օրը ապրիլի 24-ն է:-0-
