Ավելի քան 32 հազար հայեր Աբխազիայի անձնագրեր են ստացել

07.12.2009, 11:54
Ավելի քան 32 հազար հայեր Աբխազիայի անձնագրեր են ստացել

Ավելի քան 32 հազար հայեր անձնագրեր են ստացել Աբխազիայում, տեղեկացնում է Analitika.at.ua-ն։

Աբխազիայի բնակիչների 90 տոկոսն արդեն ստացել են հանրապետության քաղաքացու անձնագրեր։ Անձը հաստատող հիմնական փաստաթուղթ է տրվել Աբխազիայում բնակվող բոլոր 85 ազգությունների ներկայացուցիչներին։

Աբխազիայի Հանրապետության նախագահի պաշտոնական կայքի տվյալների համաձայն՝ անձնագիր ստացածների թվում են՝ 73 622 աբխազ, 32 363 հայ, 17 795 ռուս, 12 156 վրացի, 2 430 ուկրաինացի, 2 138 աբազին, 1 500 հույն։ Ընդհանուր առմամբ տրվել է Աբխազիայի քաղաքացու 146 121 անձնագիր։
 
2003 թվականին փոխվել է Աբխազիայի գլխավոր փաստաթուղթը։
 
Ինչպես հայտնում է Բի-Բի-Սին, հանրապետության քաղաքացու անձնագիր է տրվում  Աբխազիայի բնակիչներին այն պատճառով, որ տեղական ընտրություններին կարող են մասնակցել միայն աբխազական անձնագրեր ունեցողները։ Ընտրական օրենսդրությունում համապատասխան լրացումը կատարվել է Վրաստանից առանձնացած պետությունում խորհրդարանի կողմից այս տարվա հոկտեմբերի 7-ին։
 
Դեկտեմբերի 12-ին Աբխազիայում տեղի կունենան նախագահական ընտրություններ։ -0-