Փաշինյանի պատասխանն Էրդողանին. այդ հայտարարությունը ծայրահեղ վիրավորանք է հայ ժողովրդի և մարդկության համար. աշխարհը չպետք է լռի

ԵՐԵՎԱՆ, 25 ապրիլի./Նովոստի–Արմենիա/. Հայաստանի վարչապետ Նիկոլ Փաշինյանը պատասխանել է Թուրքիայի նախագահ Ռեջեփ Թայիփ Էրդողանի արած հայտարարությանն Օսմանյան կայսրությունում Հայոց ցեղասպանության 104–րդ տարելիցի կապակցությամբ։

Աշխարհասփյուռ հայության համար ապրիլի 24–ն Օսմանյան կայսրությունում իրականացված Հայոց ցեղասպանության զոհերի հիշատակի օրն է։ Նախօրեին հայությունը նշեց ոճրագործության 104–րդ տարելիցը։

Էրդողանը նախօրեին հայտարարել է, որ «Անատոլիայի մահմեդականներին և նույնիսկ կանանց, երեխաներին և ծերերին ոչնչացնող հայկական ավազակախմբերի և նրանց կողմնակիցների արտաքսումն ամենախելամիտ որոշումն էր, որ կարելի էր ընդունել այդ ժամանակահատվածում»։

«Ապրիլի 24–ին արված այդ հայտարարությունը ծայրահեղ վիրավորանք է հայ ժողովրդի և մարդկության համար, Էդրողանի կողմից ատելության հռետորություն։ Աշխարհը չպետք է լռի»,– գրել է Փաշինյանն իր Twitter–ում։

Նրա խոսքով, Օսմանյան կայսրությունում Հայոց ցեղասպանության զոհերի, «մահվան երթերով» անցած ողջ հայ բնակչության որակումը որպես «ավազակախմբեր և նրանց կողմնակիցներ», մեկուկես միլիոն հայերի սպանությունը և դրա արդարացումը որպես «առավել խելամիտ գործողություն» ոչ միայն մերժման քաղաքականության նոր ալիք է, այլ նաև «մի ամբողջ ազգի սպանության արդարացում»։

Above all, doing this on #April24 is an ultimate insult to the #Armenian people and to humanity, extreme #HateSpeech by #Erdogan personally. The world must speak out. https://t.co/hQVfJc7QNt

— Nikol Pashinyan (@NikolPashinyan) April 24, 2019

Այժմյան Թուրքիան 104 տարի առաջվա իրադարձությունները ցեղասպանություն չի համարում և մինչև այսօր չի ճանաչում սեփական պատմության այդ ամոթալի էջը՝ մերժելով ինչպես հարյուր հազարավոր հայերին սրի քաշելու փաստը, այնպես էլ մերժելով դրա համար կրել բարոյական, պատմական և նյութական պատասխանատվություն։

1965 թ.-ից սկսած, դեռևս Խորհրդային Հայաստանում, վերածնվել է Հայոց ցեղասպանության ճանաչման շարժումը, որին հետևեց ավելի քան տասնյակ պետությունների և միջազգային կազմակերպությունների կողմից այդ փաստի միջազգային ճանաչումը։ Հայոց ցեղասպանության փաստը ճանաչել են բազմաթիվ պետություններ և մի շարք հեղինակավոր կազմակերպություններ։ Առաջինը ճանաչել է Ուրուգվայը 1965թ.–ին, որի օրինակին հետևել են Կիպրոսը, Ռուսաստանը, Հունաստանը, Կանադան, Իտալիայի պատգամավորների պալատը, Լիբանանը, Բելգիան, Ֆրանսիան, Պարագվայը, Արգենտինան, Շվեդիան, Բոլիվիան, Մեծ Բրիտանիան, Հոլանդիան, Սլովակիան, Գերմանիան, Լիտվան, Վենեսուելան, Լեհաստանը, Չիլին, Շվեյցարիան, Բրազիլիան, Լյուքսեմբուրգը, Ավստրիան, Վատիկանը, Չեխիան, Դանիան, ինչպես նաև Լիբիայի ժամանակավոր կառավարությունը, ԱՄՆ–ի 49 նահանգները, Սիրիան, Եվրոպական խորհրդարանը, Եկեղեցիների համաշխարհային խորհուրդը։–0–