ԵՐԵՎԱՆ, 16 հոկտեմբերի./Նովոստի-Արմենիա/. Լյուքսեմբուրգի պատգամավորների պալատը նախօրեին միաձայն ընդունել է Արցախի դեմ Ադրբեջանի սանձազերծած ռազմական գործողությունները դատապարտող բանաձև:
Օրենսդիր մարմնի կայքում տեղադրված բանաձևում նշվում է, որ ընթացիկ մարտերը հանդիսանում են կրակի դադարեցման մասին 1994թ.-ին ստորագրված համաձայնությունից ի վեր ամենադաժան մարտերը, իսկ հակամարտության հետ կապված դժվարություններն աճում են երրորդ երկրների, մասնավորապես՝ Թուրքիայի մասնակցության հետևանքով:
Նույնպես խորհրդարանն ընդգծել է, որ Թուրքիայի նախագահ Ռեջեփ Թայիփ Էրդողանը քաղաքական և ռազմական օգնություն է ցուցաբերում Ադրբեջանին, այդ թվում տեղակայելով սիրիացի վարձկանների և ռազմական սարքավորումներ, ու նշել, որ Թուրքիան ուլտիմատում է դրել՝ պնդելով, որ կրակի դադարեցման մասին համաձայնագիրը կգործի միայն այն ժամանակ, երբ Երևանին աջակցող ուժերը լքեն վիճելի տարածքները:
Լյուքսեմբուրգի պատգամավորների պալատը, գիտակցելով այն իրողությունը, որ երրորդ կողմի մասնակցությամբ այս ռազմա-քաղաքական հակամարտությունը կարող է հանգեցնել ավելի խոշոր հակամարտության՝ «Կոչ է անում կառավարությանը հստակ դատապարտել բոլոր ռազմական գործողությունները, որոնք հակասում են 1994թ.-ի համաձայնությանը»:
«Կոչ ենք անում դատապարտել ցանկացած օտարեկրյա միջամտություն, որն ուղղված է հակամարտ կողմերից մեկին, մասնավորապես Ադրբեջանին Թուրքիայի օգնությունը; աջակցել Լեռնային Ղարաբաղում կրակի դադարեցման նախաձեռնություններին և հորդորել 1994թ.-ի կրակի դադարեցման վերաբերյալ համաձայնության սկզբունքների պահպանմանը»,- նշվում է բանաձևում:
