Կրեմլը չի մեկնաբանում Ալիևի հայտարարությունը՝ Նախիջևան-Ադրբեջան միջանցքի գաղափարը հավանության արժանանալու մասին

ԵՐԵՎԱՆ, 1 դեկտեմբերի./Նովոստի-Արմենիա/. ՌԴ նախագահի մամուլի քարտուղար Դմիտրի Պեսկովը հրաժարվել է մեկնաբանել Ադրբեջանի նախագահ Իլհամ Ալիևի հայտարարություններն այն մասին, որ ՌԴ և Թուրքիայի առաջնորդները դրական են վերաբերվել Նախիջևանը Ադրբեջանի արևմտյան շրջանների հետ կապող միջանցք կառուցելու գաղափարին,հաղորդում է ՏԱՍՍ-ը:

Ընդ որում, Կրեմլի ներկայացուցիչը ուշադրություն է հրավիրել այն բանի վրա, որ տրանսպորտային հաղորդակցությունների թեման քննարկվում է առաջնորդների կողմից:

«Կոնկրետ այս թեման կթողնեմ առանց մեկնաբանությունների»,- պատասխանել է Պեսկովը երեքշաբթի լրագրողների հարցերին այն մասին, թե արդյոք ՌԴ նախագահ Վլադիմիր Պուտինը դրական է վերաբերվել Նախիջևանից Ադրբեջան տանող միջանցքի գաղափարին:

Նա հիշեցրել է, որ մեկ կամ երկու շաբաթ առաջ Ալիևի և Պուտինի միջև հետախոսազրույցների մասին հաղորդագրություններից մեկում ասվում էր, որ պետությունների ղեկավարները այլ խնդիրներից զատ քննարկել են նաև տարածաշրջանում տրանսպորտային հաղորդակցությունների ապաշրջափակման և զարգացման հարցեր:

Նրա խոսքով, «տրանսպորային հաղորդակցությունների թեման օրակարգում է գտնվում և քննարկվում առաջնորդների կողմից»: -0-