Հայաստանի նախագահ Սերժ Սարգսյանը և Ադրբեջանի նախագահ Իլհամ Ալիևը պատրաստ են առաջիկայում կրկին հանդիպել ղարաբաղյան հակամարտության կարգավորման բանակցությունների անցկացման համար, երեքշաբթի հաղորդեց ԵԱՀԿ պաշտոնական կայքը՝ հղում անելով ԵԱՀԿ Մինսկի խմբի համանախագահ երկրների պատվիրակությունների ղեկավարների և Հայաստանի ու Ադրբեջանի ԱԳՆ ղեկավարների համատեղ հայտարարությանը:
Վիլնյուսում ԵԱՀԿ նախարարների խորհրդի հանդիպման ժամանակ ԵԱՀԿ Մինսկի խմբի համանախագահ երկրների պատվիրակությունների ղեկավարները (ՌԴ արտգործնախարար Սերգեյ Լավրով, ԱՄՆ պետքարտուղար Հիլարի Քլինթոն և Ֆրանսիայի եվրոպական գործերի նախարար Ժան Լեոնետի), ինչպես նաև Ադրբեջանի արտգործնախարար Էլմար Մահմեդյարովը և Հայաստանի արտգործնախարար Էդվարդ Նալբանդյանը կրկին հաստատել են ղարաբաղյան հակամարտության խաղաղ կարգավորման ձեռքբերման կարևորությունը, ասվում է հաղորդագրության մեջ:
Հայտարարության մեջ նշվում է, որ հինգ պատվիրակությունների ղեկավարները համաձայնել են ԵԱՀԿ ՄԽ ձևաչափով բանակցային գործընթացը շարունակելու և դեպի խաղաղ կարգավորում առաջ ընթանալու համար մթնոլորտը բարելավելու անհրաժեշտության հարցում, հաղորդում է «ՌԻԱ Նովոստին»:
«Նրանք համաձայնել են, որ իբրև այդ ուղղությամբ իրականացվող քայլերից մեկը՝ անհրաժեշտ է հետագա ջանքերն ուղդել հրադադարի ռեժիմի խախտման հետաքննությունների անցկացման մեխանիզմի մանրամասնմանը, ինչը 2011թ.-ի մարտին Սոչիում տեղի ունեցած գագաթնաժողովի ընթացքում նախագահներ Իլհամ Ալիևի, Սերժ Սարգսյանի և Դմիտրի Մեդվեդևի արած համատեղ հայտարարության արդյունքն է:
ԵԱՀԿ ՄԽ համանախագահ երկրների պատվիրակությունների ղեկավարները ափսոսանք են հայտնել, որ կողմերը չեն կարողացել ավարտին հասցնել ղարաբաղյան հակամարտության խաղաղ կարգավորման հիմնարար սկզբունքների ուղղությամբ տարվող աշխատանքը:
Պատվիրակությունների երեք ղեկավարները կրկին հաստատել են, որ ղարաբաղյան հակամարտության ռազմական լուծում չկա:
Ադրբեջանի և Հայաստանի նախարարները բարձր են գնահատել շրջանակային պայմանավորվածության մշակմանը համանախագահ երկրների ցուցաբերած աջակցության ջանքերը, ինչը համապարփակ խաղաղ կարգավորման հասնելու հիմք կդառնար:
«Նրանք համանախագահ երկրների պատվիրակությունների ղեկավարներին տեղեկացրել են, որ իրենց պետությունների նախագահները, համանախագահ երկրների աջակցության դեպքում, պատրաստ են կրկին հանդիպել առաջիկայում՝ հաշվի առնելով իրենց ժողովուրդների համար խաղաղության, կայունության և բարգավաճման ապահովման ճանապարհների մասին իրենց ուղիղ երկխոսության վերջին փորձը»,- ասվում է հայտարարության մեջ:
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ. մայիսի 12-ին զինադադարի վերաբերյալ եռակողմ համաձայնագրի կնքումից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչև այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-
