ՌԴ-ն հուսով է, որ Բաքուն կարձագանքի ղարաբաղյան կարգավորման վերաբերյալ առաջարկներին. ԱԳՆ

ԵՐԵՎԱՆ, 8 հուլիսի. /Նովոստի-Արմենիա/. Ռուսաստանը հուսով է, որ Ադրբեջանը կարձագանքի այն գաղափարներին, որոնք տեղ են գտել Լեռնային Ղարաբաղի կարգավորման վերաբերյալ ՌԴ նախագահ Դմիտրի Մեդվեդևի անձնական ուղերձում, ուրբաթ հայտնել է ՌԴ ԱԳՆ ղեկավար Սերգեյ Լավրովը։

Լավրովն ուրբաթ փոխանցել է ՌԴ նախագահի առաջարկներն Ադրբեջանի նախագահ Իլհամ Ալիևին։

«Առաջարկությունները ես փոխանցում եմ Ձեզ։ Կարծում եմ, որ դրանք ուսումնասիրելուց հետո Դուք կարձագանքեք այգ գաղափարներին»,- ուրբաթ ասաց ՌԴ ԱԳՆ ղեկավարը՝ Ալիևին ուղերձը փոխանցելիս, հաղորդում է «ՌԻԱ Նովոստին»։

Ավելի վաղ ՌԴ ԱԳՆ ղեկավարն ուրբաթ ղարաբաղյան հակամարտության կարգավորման խնդրի վերաբերյալ Մեդվեդևի՝ այդ հարցի լուծման առաջարկներ պարունակող անձնական ուղերձն է փոխանցել Հայաստանի նախագահ Սերժ Սարգսյանին։ Նախարարի խոսքով՝ հայկական կողմը խոստացել է ուսումնասիրել դրանք մոտ ժամանակներս։

Լավրովի այցը Հայաստան և Ադրբեջան կայացել է Ռուսաստանի նախագահի հանձնարարականով։ Հունիսի 24-ին Կազանում տեղի են ունեցել Ղարաբաղի վերաբերյալ Հայաստանի ու Ադրբեջանի նախագահներ Սերժ Սարգսյանի և Իլհամ Ալիևի բանակցություններտ՝ ՌԴ նախագահի նախաձեռնությամբ ու մասնակցությամբ։ Գագաթնաժողովն ավարտվել է առանց որևէ պայմանավորվածության Լեռնային Ղարաբաղի կարգավորման հիմնարար սկզբունքների վերաբերյալ, թեև կողմերն առաջընթաց են արձանագրել այդ հարցում։ Կազանյան գագաթնաժողովը դարձել է 2008 թվականից բարձր մակարդակով իններորդ եռակողմ և ընթացիկ տարվա երկրորդ հանդիպումը։ Նախորդ գագաթնաժողովն անցկացվել է մարտի 5-ին՝ Սոչիում։

Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:

Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:

1994թ. մայիսի 12-ին զինադադարի վերաբերյալ եռակողմ համաձայնագրի կնքումից  հետո հակամարտության գոտում դադարեցին ռազմական գործողությունները, որոնց հետևանքով երկու կողմից էլ եղավ շուրջ 25-30 հազար զոհ և մոտ մեկ միլիոն մարդ  ստիպված լքեց բնօրրանը:

Հրադադարի ռեժիմ հաստատելու վերաբերյալ համաձայնագիրը մինչև այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-