Սիրիան կողմ է ղարաբաղյան խնդրի արդար լուծմանը, որը պատասխանում է կողմերի շահերին, երեքշաբթի Երևանում ասաց Սիրիայի արտգործնախարար Ուալիդ Ալ-Մուալլիմը։
«Մենք կարծում ենք, որ անմիջական երկխոսության միջոցով անհրաժեշտ է գտնել խնդրի քաղաքական լուծումը։ Վերջինը պետք է արդար լինի, պետք է պատասխանի ադրբեջանցիների և հայերի շահերին ու հանգեցնի երկու հարևան երկրների հարաբերությունների կարգավորմանը», - ասաց Սիրիայի արտգործնախարարն իր հայ գործընկեր Էդվարդ Նալբանդյանի հետ մամուլի ասուլիսի ընթացքում։
«Որևէ այլ լուծում փնտրելու փորձերը հակասում են երկու ժողովուրդների շահերին, էլ ավելի կբարդացնեն տարածաշրջանային խնդիրները և կհետաձգեն ցանկալի կարգավորումը», - ասաց Մուալլիմը։
Նրա խոսքերով, կողմերը պետք է խիզախություն և քաղաքական կամք դրսևորեն՝ արդար լուծմանը հասնելու համար։
Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։
1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։
Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։
1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։
Զինադադարի ռեժիմի մասին համաձայնությունը պահպանվում է մինչ այժմ։
1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։-0-
