ՍՏԵՓԱՆԱԿԵՐՏ, 3 փետրվարի. /Նովոստի-Արմենիա/. 5-րդ գումարման Ազգային ժողովի 5-րդ նստաշրջանի օրակարգի ձևավորման հարցը քննարկվել է նախօրեին ԼՂՀ ԱԺ խոսնակ Աշոտ Ղուլյանի հրավիրած աշխատանքային խորհրդակցության ժամանակ, որն առաջինն էր խորհրդարանի ձմեռային արձակուրդների ավարտից հետո:
Ինչպես հաղորդում է ԼՂՀ ԱԺ մամուլի ծառայությունը, խորհրդակցության ընթացքում նշվել է, որ շրջանառության մեջ մտած 4 օրինագծից երկուսը պատգամավորական նախաձեռնության արդյունք է, իսկ երկուսը ստացվել է կառավարությունից։ Միևնույն ժամանակ ակնկալվում է, որ նստաշրջանի օրակարգն առաջիկայում կհամալրվի ինչպես գործադիրի, նույնպես և պատգամավորների նոր օրենսդրական նախաձեռնություններով:
Խորհրդակցությանն այնուհետև անդրադարձ է կատարվել միջազգային կառույցներում ՀՀ Ազգային ժողովի պատվիրակությունների ղեկավարների մասնակցությամբ` հունվարի 18-ին Հայաստանի խորհրդարանում անցկացված խորհրդակցությանը, ԼՂՀ ԱԺ նախագահի մասնակցության արդյունքներին: Մասնավորապես, ներկայացնելով ՀՀ ԱԺ-ում անցկացված խորհրդակցությանը` ղարաբաղյան կարգավորման հարցի շուրջ հնչած տեսակետները, խորհրդարանի նախագահը մատնանշել է դրանցից բխող հետևություններն ու առաջիկա անելիքները:
Աշխատանքային խորհրդակցությանը քննարկվել են նաև հարցեր` կապված ընթացիկ ամսում սպասվող խորհրդարանական և այլ միջոցառումների կազմակերպման ու անցկացման խնդիրների հետ, տրվել են համապատասխան հանձնարարականներ:
Քննարկմանը մասնակցել են ԱԺ ղեկավար կազմի և աշխատակազմի ծառայությունների պատասխանատուները:-0-
