Հայաստանի և Ադրբեջանի ԱԳՆ ղեկավարները բարձր մակարդակով հանդիպում են նախապատրաստում. Հոգլանդ

ԵՐԵՎԱՆ, 27 մարտի. /Նովոստի–Արմենիա/. Հայաստանի և Ադրբեջանի արտաքին գործերի նախարարները բարձր մակարդակով հանդիպում են նախապատրաստում, երկուշաբթի լրագրողներին ասաց ԵԱՀԿ ՄԽ ամերիկացի համանախագահ Ռիչարդ Հոգլանդը։

«Բարձր մակարդակով հանդիպման վերաբերյալ պայմանավորվածություններ կան։ Մենք և մեր քաղաքական ղեկավարությունը մշտապես ճիշտ պայմանների որոնման մեջ ենք, որոնց դեպքում կարող ենք կազմակերպել արտաքին գործերի նախարարների և նախագահների հանդիպումներ։ Եվ այս պահին դա ընթացքի մեջ է»,– ասաց Հոգլանդը։

Ինչ վերաբերում է ժամկետներին, ապա նա նշեց, որ խոսքը ոչ թե ամիսների, այլ ավելի կարճ ժամկետի մասին է։
«Մենք կարծում ենք, որ առաջիկայում երկու արտգործնախարարները կհանդիպեն Մոսկվայում կամ ինչ–որ մի այլ վայրում` նախագահների հանդիպում նախապատրաստելու համար»,– ասաց Հոգլանդը։

Ըստ նրա, բանակցությունների սեղանին կարգավորման մի քանի ծրագրեր են դրված, հնարավոր է` ոչ վերջնական։

«Բանակցությունների ժամանակն է։ Բայց չեմ կարող ձեզ մանրամասներ հայտնել, որոնք կարող են սխալ մեկնաբանվել։ Կարևոր է, որ երկու կողմերից ամենաբարձր մակարդակով քաղաքական կամք լինի բանակցություններին վերադառնալու և խաղաղ կարգավորման շուրջ աշխատելու ուղղությամբ»,– ասաց Հոգլանդը։

Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։ 1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։

Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։

1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։

Զինադադարի ռեժիմի մասին համաձայնությունը պահպանվում է մինչ այժմ։ 1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակում։–0–