ԵՐԵՎԱՆ, 8 հոկտեմբերի. /Նովոստի Արմենիա/. ԵԱՀԿ Մինսկի խմբի համանախագահներ Իգոր Պոպովը (Ռուսաստան),Ստեֆան Վիսկոնտին (Ֆրանսիա) և Էնդրյու Շեֆերը (ԱՄՆ) հոկտեմբերի 6-ին հանդիպել են Հայաստանի նախագահ Սերժ Սարգսյանի, իսկ հոկտեմբերի 7-ին Ադրբեջանի նախագահ Իլհամ Ալիևի հետ:
Ինչպես նշվում է համանախագահների տարածած հաղորդագրության մեջ, հանդիպումները կայացել են նախագահների սպասվելիք հանդիպման նախապատրաստումն ավարտելու, այդ թվում` բանակցությունների հնարավոր թեմաներն ուրվագծելու համար: Համանախագահներին միացել է նաև ԵԱՀԿ գործող նախագահի անձնական ներկայացուցիչ, դեսպան Անջեյ Կասպրշիկը:
«Երկու երկրների նախագահները համաձայնություն հայտնեցին վերսկսել հակամարտության խաղաղ կարգավորմանն ուղղված բանակցությունները», - ասվում է համանախագահների հայտարարության մեջ:
Загружается новость ...
"Право"
Սպասվող հանդիպման մասին հայտարարությունը կողմերը կտարածեն առաջիկայում:
Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։
1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։
Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։ 1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։
Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։ Զինադադարի ռեժիմի մասին համաձայնությունը պահպանվում է մինչ այժմ։ 1992 թ.-ից մինչ օրս ընթանում են բանակցություններ` հակամարտության խաղաղ կարգավորման ուղղությամբ` ԵԱՀԿ Մինսկի խմբի շրջանակում, որի համանախագահներն են ԱՄՆ-ն, Ռուսաստանը և Ֆրանսիան։-0-