Կոսովոյում և Աֆղանստանում հայ խաղաղապահները նպաստում են Հայաստանի միջազգային հեղինակության բարձրացմանը, հայտարարեց Հայաստանի ԱԳՆ սպառազինության և միջազգային անվտանգության վերահսկողության վարչության պետ Սամվել Մկրտչյանը:
«Ավանդ ներդնելով միջազգային անվտանգության ապահովման գործում՝ դուք նպաստում եք Հայաստանի հեղինակության բարձրացմանը, և մեր երկիրն արժանանում է զանազան գովասանքների՝ ձեր օրինակելի ծառայության շնորհիվ»,- ասաց նա Երևան-Պրիշտինա և Երևան-Մազարե-Շարիֆ տեսակամուրջի ընթացքում, որն անցկացվում էր Կոսովոյում և Աֆղանստանու հայկական խաղաղախահ բրիգադների զինծառայողների և նրանց ընտանիքների անդամների մասնակցությամբ:
Մկրտչյանը ողջունեց արդեն ավանդական դարձած միջոցառման մասնակիցներին, ովքեր այս միջոցառման շնորհիվ հնարավորություն են ունենում շփվել իրենց հարազատների հետ:
«Մաղթում եմ ձեզ հաջող ծառայություն և վերադարձ ձեր ընտանիքներին: Ձեր առաքելությունը, ինչպես նաև ՆԱՏՕ-ի հետ համագործակցության շրջանակներում անցկացվող այլ միջոցառումներ նպաստում են Հայաստանի անվտանգության ամրապնդմանը՝ երկիրը միջազգային անվտանգության համակարգում ներգրավելու միջոցով»,- ընդգծեց նա:
Հայաստանում ԱՄՆ Արտակարգ և Լիազոր դեսպան Ջոն Հեֆֆերնն (John Heffern) իր հերթին նշեց, որ հայ զինծառայողների մասնակցությունը ՆԱՏՕ-ի խաղաղարար կազմում շատ կարևոր է ինչպես հանրապետության, այնպես էլ Հայաստան-ՆԱՏՕ և Հայաստան-ԱՄՆ հարաբերությունների համար:
«Ես շնորհակալություն եմ հայտնում ձեր ծառայության համար ԱՄՆ-ի կառավարության և ժողովրդի կողմից»,- ասաց նա:
Տեսակամուրջի ընթացքում հայ խաղաղապահներին ողջունեցին նաև Գերմանիայի և Մեծ Բրիտանիայի դեսպանները:
«Ուրախ ենք, որ Աֆղանստանում հայ խաղաղպահներն իրենց գործունեությունն իրականացնում են գերմանական հրամանատարության ներքո: Հույս ունենք, որ վերջիվերջո զորքերը դուրս կբերվեն Աֆղանստանից, իսկ հայ զինծառայողները կշարունակեն մասնակցել ՆԱՏՕ-ի խաղաղապահ առաքելություններին»,- ասաց Հայաստանում Գերմանիայի Արտակարգ և Լիազոր դեսպան Հանս-Յոհան Շմիդտը:
Երևան-Պրիշտինա և Երևան-Մազարե-Շարիֆ տեսակամուրջը կազմակերպվել է Հայաստանում ՆԱՏՕ-ի Շաբաթվա (հոկտեմբերի 16-21-ը) շրջանակներում՝ Հայաստան-ՆԱՏՕ Անհատական գործընկերության գործողությունների ծրագրով (Individual Partnership Action Plan - IPAP):
IPAP ծրագիրը ստորագրվել է 2005 թվականի դեկտեմբերին: --0
