Առաջիկայում Հայաստանի 3 սահմանային անցակետերի արդիականացման միջազգային մրցույթ կհայտարարվի. UNDP

Հայաստանի 3 սահմանային անցակետերի արդիականացման աշխատանքներին մասնակցության միջազգային մրցույթ կհայտարարվի առաջիկայում, հայտարարել է Հայաստանում ՄԱԿ-ի մշտական համակարգող, UNDP-ի մշտական ներկայացուցիչ Դաֆինա Գերչևան ՀՀ ԱԱԽ քարտուղար Արթուր Բաղդասարյանի հետ հանդիպման ընթացքում:

«ՀՀ ԱԱԽ քարտուղար Արթուր Բաղդասարյանի հետ հանդիպման ընթացքում Գերչևան ներկայացրել է Հայաստանի 3 սահմանային անցակետերի բարեփոխման ծրագրի իրականացնող գործընկեր UNDP-ի կողմից կատարված աշխատանքի ընթացքը` նշելով, որ 3 սահմանային անցակետերի բարեփոխման նախագծահաշվարկային աշխատանքներն ավարտված են», - հաղորդում է ԱԱԽ մամուլի ծառայությունը:

Բաղդասարյանն իր հերթին ընդգծել է Եվրամիության չափանիշներին լիովին համապատասխանող սահմանային անցակետեր ունենալու կարևորագույն առաջնահերթությունն առավելագույնս սեղմ ժամկետներում կենսագործելու անհրաժեշտությունը: 

ԵՄ-ն Հայաստանին 7,7 մլն եվրո է տրամադրել՝ «Հարավային Կովկասում Սահմանների համալիր կառավարման» ծրագրի շրջանակներում Բագրատաշենի, Բավրայի, Գոգավանի սահմանային կետերի արդիականացման նպատակով:

«Հարավային Կովկասում Սահմանների համալիր կառավարման» (ՀԿՍՀԿ) ծրագրի նպատակը Հայաստանում, Վրաստանում և Ադրբեջանում սահմանների համալիր կառավարման սկզբունքների գործնական մեխանիզմների ներդրումն է, ինչպես նաև ներգերատեսչական, միջգերատեսչական և միջազգային համագործակցության ընդլայնումն ու զարգացումը, մասնավորապես` Հարավային Կովկասի երկրների, ԵՄ անդամ-պետությունների և միջազգային կառույցների միջև, ինչն ուղղված է ապրանքների և մարդկանց օրինական տեղաշարժերի ապահովմանը և միաժամանակ` ցանկացած ապօրինի գործունեությունից պետական սահմանի պաշտպանվածությանը: -0—